DILI, STLTIMORLESTE.com – Prezidente Republika (PR), Jose Ramos Horta sei konsulta ho Primeiru Ministru Kay Rala Xanana Gusmão atu fo estatutu neebe ekivalente ba Universidade Nasional Timor Leste (UNTL).
Prezidente Republika Jose Ramos Horta hatoo lia hirak nee liu husi nia diskursu, bainhira halo lansamentu ba livru titulu tinan 50 independensia, Reflesaun Nasional ida konaba trajetoria Timor Leste nian, hanoin hikas pasadu no projeta futuru, husi UNTL, iha palasiu Prezidensial Nicolau Lobato, Bairo Pite, Segunda (10/08/2026).
PR hatete, Prezidente sempre defende estatutu UNTL, tanba nee sei koalia ho Primeiru Ministru Kay Rala Xanana Gusmão atu fo estatutu neebe ekivalente ba UNTL.
“Hau hatete ba ita boot sira, hau mak uluk kedas nuudar Ministru, Prezidente Primeiru mandatu hau ensiste Governu para fo estatutu Reitor UNTL nia, hau defende too agora, defende estatutu nuudar ministru, sira mak fo deit hanesan Sekretariu Estadu, hau sei litik fali Primeiru Ministru fo estatutu ekivalente ba ministru nia, tanba nee Reitor Sekretariu Estadu balun Estudu laiha tan,” katak Prezidente Republika.
Prezidente Republika hatete, Reitor UNTL iha nivel neebe aas ho doutoramentu maibe nivel hanesan fali ho Sekretariu Estadu, maibe Sekretariu Estadu balun nia estudu ladun boot hanesan Reitor.
Nunee mos Dosente UNTL, Amandio de Aroujo Sarmento hatete, muda estatutu UNTL hanesan ministeriu nee nesesariu, maibe nee desizaun husi Governu.
“Nee nesesidade maibe depende ba Governu, maibe iha kualker pais balun status reitor nivel hanesan ho Ministeriu tanba konkorda ho idea husi Prezidente Republika katak UNTL uniku universidade Estatal neebe mak eziste iha Timor Leste, presiza haree tau nia estatutu, tanba UNTL produs ona rekursu barak tebes ba kontribuisaun dezenvolvimentu iha pais ida nee, maibe buat hotu fila ba Governu haree nesesariu ka lae?,” dehan Dosente UNTL Amandio.
Dosente UNTL hatete, tuir nia haree nuudar manorin nain iha UNTL haree nee nesesariu tebes ba nivel, no haree mos espasu neebe mak diak para UNTL ho nia estrutura tomak husi Reitor too ba estrutura tomak halo servisu neebe diak hodi ajuda dezenvolvimentu lao iha Timor Leste nia.
Dosente haktuir tan katak, Prezidente nia hanoin muda estatutu UNTL hanesan ministru nee hanoin neebe mak diak, maibe ida nee fila fali ba desizaun husi Governu.
Regras baziku neebe regula estrutura, funsaun no jestaun tomak iha Universidade Nasional Timor Lorosae. Tuir Dekreto-Lei N.° 24/2022, de 29 de Junho estatutu organiku UNTL nee maka estatutu foun neebe troka estatutu tuan husi 2010. Pontu importante sira iha Estatutu 2022.
Estrutura Jestaun UNTL Reitor Juviano António da Costa. Fakuldade sira iha UNTL – Total 10 husi Fakuldade Agrikultura, Fakuldade Siensia Sosial, Fakuldade Direitu Fakuldade Ekonomia no Jestaun, Fakuldade Engenaria, Siensia no Teknolojia, Fakuldade Filosofia, Fakuldade Medisina no Siensia Saude, Fakuldade Edukasaun, Arte no Humanidade, Fakuldade Siensia Politika no Departamentu Komunikasaun Sosial.
UNTL iha autonomia pedagojika, sientífika, kultural no administrativa. Maibe hetan tutela husi Ministeriu Ensinu Superior, Siensia no Kultura – MESCC.
(eme)
