DILI, STLTIMORLESTE.com – Prezidente Repúblika (PR), José Ramos-Horta hatete, sei tetu didiak antes deside atu re-kandidata an ba eleisaun Prezidensiál 2027.
Horta hato’o deklarasaun ne’e ba jornalista sira iha Aeroportu Internasionál Nicolau Lobato, Komoro, Dili, Kinta, 8/10/2026.
Nia hatete, maske Primeiru-Ministru Kay Rala Xanana Gusmão husu nia atu re-kandidata an, desizaun sei depende ba nia avaliasaun pesoál.
“Primeiru-Ministru seidauk koalia ho hau kona-ba eleisaun Prezidensial 2027. Hau sei tetu didiak tanba tinan lima tan todan loos,” dehan Prezidente Horta.
Horta hatete, bainhira nia eleitu ba mandatu daruak iha 2022, nia reza atu tinan lima liu lalais. Agora, nia presiza konsidera didiak antes halo desizaun foun.
“Kuandu hau eleitu primeiru vez iha 2022, hau reza ba Maromak atu tinan lima liu lalais. Agora, hau sei tetu didiak,” dehan Horta.
Informasaun kona-ba Timor-Leste sei lidera ASEAN iha 2029 mos sai hanesan argumentu ida ne’ebé Primeiru-Ministru bele konsidera atu husu Horta re-kandidata an.
Maibé, Horta hatete Partidu CNRT iha kandidatu potensial barak ne’ebé bele konsidera ba eleisaun Prezidensiál 2027.
“Iha kandidatu potensial balun, hanesan Bendito Freitas, Rui Araújo, Elder Costa no elementu CNRT seluk,” dehan Horta.
Horta hatete, durante nia la iha poder entre 2012 no 2022, nia nafatin prontu atu fó apoiu ba Prezidente sira bainhira husu nia halo misaun.
Nia hatete, maske servisu iha Nasoins Unidas no iha misaun internasionál oioin, nia nafatin buka dalan atu apoia interese Timor-Leste.
Prezidente Horta mos hatete, se kandidatu seluk konkore no hetan eleisaun, nia sei nafatin fó apoiu ba Prezidente foun.
José Ramos-Horta agora hala’o mandatu daruak nu’udar Prezidente Repúblika, depois de eleisaun Prezidensiál 2022.
Nia primeiru mandatu nu’udar Prezidente hala’o husi 2007 to’o 2012, antes fila fali ba kargu ne’e iha 2022.
Mandatu atual Horta hahú iha 20 Maiu 2022 no sei remata iha 2027, tuir períodu mandatu konstitusionál tinan lima.
Tanba ne’e, diskusaun kona-ba kandidatura ba eleisaun Prezidensiál 2027 komesa sai importante, liuliu bainhira lider polítiku sira hahú konsidera kandidatu potensial.
Bainhira jornalista husu se Primeiru Ministru tula liman nafatin Prezidente pronto kalae? hatan ba kestaun nee PR Horta hatete nia seidauk prontu no sei presiza tempu atu pensa no tetu didiak.
“Hau seidauk prontu. Hau sei hanoin didiak no tetu didiak lai,” dehan Prezidente Repúblika José Ramos-Horta.
(eme)
