DILI, STLTIMORLESTE.com – Prezidente Repúblika (PR), José Ramos Horta hateten, Simeira Siénsia ba Dezenvolvimentu 2026 sai nu’udar eventu istóriku, tanba primeira vez iha Timor Leste no primeira vez iha Sudeste Aziátiku, sientista no laureadu Prémiu Nobel husi nasaun oi-oin mai hamutuk iha grupu boot.
Ramos Horta hato’o deklarasaun ne’e ba jornalista sira iha Centro de Convenções de Díli (CCD), Tersa (25 Agostu 2026), bainhira ensera Simeira Siénsia ba Dezenvolvimentu.
Nia hateten katak durante loron rua, sientista husi área oioin, inklui siénsia médika, astronomia, teknolojia informasaun no ekonomia, mai Timor-Leste atu partisipa iha diskusaun kona-ba siénsia no dezenvolvimentu.
Tuir Ramos Horta, depois Simeira, balun husi sientista sira sei bá Atauro no balun sei vizita plantasaun kafé iha Railaku, Ermera, hodi haree diretamente realidade no potensialidade Timor Leste.
Prezidente hateten, iha 27 Agostu, nia sei akompaña sientista sira ba Jakarta, Indonézia, no iha 28 Agostu sei partisipa iha enkontru ho Eis-Prezidente Indonézia Megawati Soekarnoputri no Prezidente Prabowo Subianto.
Nia hateten, parte Indonézia mós husu atu simu no organiza programa ba sientista sira durante sira-nia vizita iha Jakarta.
Ramos Horta hatete, sientista sira hatudu kontente ho realidade ne’ebé sira haree iha Timor-Leste, liuliu iha área edukasaun no juventude.
Maski Timor Leste sei enfrenta dezafiu barak, sientista sira, tuir Prezidente, hatudu otimismo no hakarak kontinua fó apoiu ba Timor Leste.
Nia subliña, sientista sira mai husi Kanada, Rúsia, Estadus Unidus, Singapura, Europa no nasaun seluk, no sira-nia prezensa iha Timor Leste hatudu katak nasaun ki’ik no joven hanesan Timor-Leste bele atrai ema ho koñesimentu sientífiku boot husi mundu.
“Timor Leste rai ida ki’ik, foun, la’ós tinan 50 independénsia, maibé bele dada ema sientista boot liu iha mundu mai iha ne’e,” dehan Ramos Horta.
Nia hateten, prezensa sientista sira mós hatudu katak Governu Timor-Leste, Primeiru-Ministru Xanana Gusmão, nia rasik no membru Governu sira bele organiza eventu ida ho estrutura di’ak, metodolojia rigór no orientasaun akademika.
Prezidente subliña katak Simeira ne’e liuliu fó espasu ba estudante universitáriu sira, inklui sira ne’ebé estuda iha área siénsia, atu hasoru diretamente sientista no laureadu internasionál sira.
(eme)
