DILI, STLTIMORLESTE.com – Prezidente Repúblika (PR), José Ramos-Horta simu karta hosi Sekretáriu-Jerál ASEAN, Kao Kim Hourn, kona-ba Loron ASEAN dala 59.
Karta ne’e haruka hosi Sekretáriu-Jerál ASEAN, S.E. Dr. Kao Kim Hourn, nu’udar resposta ba mensajen felisitasaun Prezidente Ramos-Horta.
Prezidente Ramos-Horta haruka mensajen felisitasaun ba Sekretáriu-Jerál ASEAN iha okaziaun Loron ASEAN nian ba dala 59, ho data 8 Agostu 2026.
Iha mensajen ne’e, Prezidente hato’o felisitasaun ba Sekretariadu ASEAN, Governu no povu Estadu-Membru ASEAN hotu, no subliña signifikadu ba Timor-Leste.
“Ha’u hakarak hato’o ba Sua Exelénsia, Sekretariadu ASEAN, Governu no povu Estadu-Membru ASEAN hotu ha’u-nia felisitasaun no votus kmanek.” dehan Prezidente Horta.
Prezidente Ramos-Horta hateten katak selebrasaun Loron ASEAN tinan ida-ne’e iha signifikadu profundu ba Timor-Leste nu’udar membru kompletu ASEAN.
Timor-Leste komemora dala uluk Loron ASEAN nu’udar membru kompletu, hafoin admisaun istórika nu’udar Estadu-Membru ASEAN ba dala 11.
Nia hateten katak, adezaun Timor-Leste sai momentu orgullu nasionál boot, ne’ebé koroa kompromisu metin durante dékada sira.
Prezidente mós subliña kompromisu Timor-Leste nian ba diplomasia pasiénsia no fiar metin iha futuru komún rejionál ASEAN.
Tuir Prezidente, Timor-Leste iha onra atu kontribui ativu ba konstrusaun rejiaun ne’ebé reziliente, inovadór, inkluzivu no sustentavel.
Iha karta resposta ho data 3 Setembru 2026, Sekretáriu-Jerál ASEAN hato’o apresiasaun sinseru ba Prezidente Ramos-Horta nia felisitasaun.
“Ha’u iha onra atu hato’o ha’u-nia apresiasaun sinseru ba Sua Exelénsia ba Ita-nia felisitasaun no liafuan kmanek sira.” Haktuir karta neebe STL asesu husi media Prezidente, Kuarta (23/09/2026).
Kao Kim Hourn hateten katak Loron ASEAN fó oportunidade atu reafirma prinsípiu fundamentál, hametin unidade no solidariedade entre Estadu-Membru.
Nia hateten katak, Timor-Leste nia adezaun marka pasu importante ida ba kreximentu, inkluzividade no unidade família ASEAN nian.
Kao Kim Hourn mós reafirma kompromisu hamutuk atu harii Komunidade ASEAN ida ne’ebé integradu, reziliente, pasífiku no prósperu.
Troka karta entre Prezidente Ramos-Horta no Sekretáriu-Jerál ASEAN subliña respeitu mútuu no kompromisu komún entre Timor-Leste no ASEAN.
Prezidente Ramos-Horta hato’o apresiasaun ba lideransa no apoiu Sekretariadu ASEAN durante prosesu adezaun kompletu Timor-Leste.
Enkuantu ne’e, Sekretáriu-Jerál ASEAN reafirma apoiu kontinuadu ba Timor-Leste no Estadu-Membru ASEAN hotu atu realiza vizaun Komunidade ASEAN.
Vizaun ne’e inklui Komunidade ASEAN ida ne’ebé reziliente, inovadór, dinámika no sentradu iha povu, tuir aspirasaun komún Estadu-Membru sira.
(eme)
