DILI, STLTIMORLESTE.com – Prezidente Republika (PR), Jose Ramos Horta simu karta kredensial husi Fairuz Rozali, nuudar Embaixador foun Malazia ba Timor Leste.
Prezidente Republika Jose Ramos Horta simu Karta Kredensial husi Fairuz Rozali, nuudar Embaixador Estraordinariu no Plenipotensiariu foun Malazia nian ba Republika Demokratika Timor Leste. Serimonia kredensial nee halao iha Palasiu Prezidensial Nicolau Lobato.
Bainhira remata entrega karta kredensial, Visi Ministra Negosiu Estranjeiru no Koperasaun (MNEK), Sejuina Maria Ferreira Gomes ba jornalista sira iha Palasiu Prezidensial Nicolau Lobato, Bairo Pite, Tersa (21/07/2026) hatete, ohin embaixador foun Malazia ba Timor mai entrega karta kredensial ba Prezidente Republika, Jose Ramos Horta, hodi troka fali Embaixador Dato Amarjit Sarjit Singh neebe nia mandatu remata ona iha fulan hira liu ba.
Visi Ministra MNEK hatete, depois entrega karta kredensial Prezidente mos konvida Embaixador enkontru kortejia, koalia liu konaba koperasaun relasaun bilateral entre Timor Leste no Malazia.
“Enkontru nee koalia liu konaba koperasaun bilateral entre Timor Leste no Malazia, inprinsipiu mak konaba ajenda ohin nia,” katak Visi Ministra.
Alende nee Embaixador Malazia ba Timor Leste, Fairuz Rozali deklara katak, nia mak daudaun nee asume kargu nuudar Embaixador Malazia ba Timor Leste hodi troka embaixador sesante Embaixador Dato Amarjit Sarjit Singh.
Embaixador Fairuz Rozali lori esperiensia diplomatika liu dekada rua ba ninia knaar foun. Desde nia hola parte iha Servisu Administrativu no Diplomatiku Malazia nian iha 2002, nia servisu ona iha pozisaun xave sira iha Ministeriu Negosiu Estranjeiru, inklui destakamentu sira iha Sekretariadu Nasional ASEAN-Malazia, Departamentu Koordenasaun no Implementasaun, OIC no Divizaun Kooperasaun Rejional, no Divizaun Polítika Multilateral. Ninia knaar sira iha rai liur inklui misaun sira Malazia nian iha Kuwait, Republika Koreia, no Estadus Unidus Amerika. Foin lalais nee, nia halao knaar nuudar Adjuntu Diretor-Jeral Divizaun Relasaun Esterna ASEAN nian iha Sekretariadu Nasional ASEAN-Malazia molok hetan nomeasaun ba Timor-Leste. Embaixador Fairuz Rozali iha Lisensiatura iha Relasaun Negosiu Internasional (Hons) husi Universiti Utara Malaysia no Mestradu iha Asuntu Internasional (ho meritu) husi Universidade Nottingham.
Iha biban nee Prezidente Republika Jose Ramos-Horta hatoo benvindu ba Embaixador Fairuz Rozali, neebe mai entrega ona karta kredensia.
“Hau kontente tebes atu simu Embaixador Fairuz Rozali iha Timor-Leste. Malazia sai hanesan parseiru loloos iha ita nia jornada dezenvolvimentu, hahu husi ita nia independensia too ita-nia adezaun ba ASEAN. Hau laiha duvida katak iha ninia lideransa, ita-nia ligasaun bilateral sira sei sai metin liutan, hodi loke oportunidade foun sira iha komersiu, kapasitasaun, no kooperasaun rejional ba benefísiu ita-nia nasaun rua nian.” dehan PR Horta.
Prezidente Ramos Horta manifesta ninia konfiansa tomak katak mandatu Embaixador Fairuz Rozali nian sei eleva no hametin lasu amizade no kooperasaun neebe dura entre Timor-Leste no Malazia.
(eme)
