DILI, STLTIMORLESTE.com – Prezidente Republika (PR), Jose Ramos Horta simu Ministru Defeza Xina, Dong Jun, hodi haforsa kooperasaun bilateral defeza nian ho parseria estratejika.
Iha loron Tersa lokraik (18/08/2026) Prezidente Republika Jose Ramos Horta simu Ministru Defeza Nasional Xina nian, Almirante Dong Jun, ba enkontru bilateral nível aas iha Palasiu Prezidensial iha enkontru deskute hamutuk oinsa hametin koperasaun bilateral defeza nia nomos parseria estratejika sira.
Iha enkontru nee servi hodi reafirma ligasaun diplomatika neebe metin no eleva liu husi Parseria Estratejika Abranjente, no foka ba espansaun diplomasia defeza bilateral, haforsa kapasidade instituisional, no kolaborasaun teknika entre nasaun rua nee.
Iha diskusaun nee, líder nain rua aborda area xave sira ba kolaborasaun iha futuru, inklui edukasaun militar profisional, lojístika no apoiu tekniku no seguransa marítima hodi proteje tasi-ibun no rekursu peska nasional.
Iha biban nee Prezidente Republika Jose Ramos Horta espresa ninia apresiasaun ba asistensia kontínua husi Pekin ba FALINTIL-Forsa Defeza Timor Leste (F-FDTL), liu-liu elojia realizasaun Ospital Amizade Timor Leste–Xina ho valor millaun USD 20 (millaun CNY 162) iha Fatuhada, inklui mos misaun umanitaria no medika sira iha pasadu neebe halao husi ro-ospital xines Peace Ark.
Prezidente Ramos Horta reafirma polítika esterna Timor Leste nian neebe metin, independente no ekilibrada, hodi fo enfaze ba kompromisu nasaun nian ba engajamentu konstrutivu iha Indo-Pasífiku, enkuantu evita dependensia demais ba parseiru esternu ida deit.
“Hodi haforsa fali adezaun Timor Leste nian ba prinsípiu Xina unika, Xefe Estadu subliña katak parseria neebe lao hela iha defeza, saude, no infraestrutura sai nuudar pilar vital ba kooperasaun Sul-Sul, pas, no dezenvolvimentu sustentavel ba tempu naruk ba povu timoroan,” katak PR Horta.
Aleinde nee Prezidente Republika hatoo benvindu ba Ministru Defeza Xina, Dong Jun neebe mai Palasiu hodi haforsa kooperasaun bilateral defeza nian ho parseria estratejika.
(eme)
