DILI, STLTIMORLESTE.com – Prezidente Republika (PR), Jose Ramos Horta too ona Vanuatu, no vizita nee hodi reafirma parseria istoriku neebe klean, hodi fo ondra ba nasaun refere neebe defende Timor Leste iha Nasoens Unidas.
Prezidente Republika, Jose Ramos Horta too iha Port Vila simu ho Guarda de Onra hodi hahu Vizita Estadu istorika dahuluk ba Republika Vanuatu.
Viajen ofisial nee sei kontinua ho kalan Jantar neebe ofrese husi Ministru Negosius Estranjeirus Vanuatu nian, hahu husi enkontru foin lalais iha Papua-Gine Foun, iha neebe Primeiru-Ministru Vanuatu ofisialmente konvida Prezidente atu atende selebrasaun Loron Independensia ba-46 nasaun nian neebe besik dadaun ona.
Prezidente Republika Jose Ramos Horta hatete vizita ida nee fo kontinuidade hafoin reuniaun Konsellu Ministru neebe halao foin lalais nee iha loron 22 fulan Jullu, neebe aprova ona akordu entre Republika Demokratika Timor-Leste no Republika Vanuatu konaba Programa Koperasaun teknika ba Dezenvolvimentu.
“Vizita nee reafirma parseiria istorika neebe klean, hodi fo onra ba fatin uniku Vanuatu nian iha istoria nuudar estadu illa Pasífiku mesak neebe defende soberania Timor-Leste nian iha Nasoins Unidas. Nuudar jestu gratidaun boot ba apoiu neebe metin durante movimentu libertasaun Timor nian,” dehan Prezidente Republika liu husi komunikadu neebe STL asesu husi media Prezidensia Republika Kuarta (29/07/2026).
Iha vizita nee Prezidente Ramos Horta sei kondekora Orden Timor-Leste ba lideransa Vanuatu nian durante festividade independensia iha loron 30 Jullu, hodi hametin liu tan relasaun diplomatika.
Aleinde selebrasaun sira nee, ajenda Prezidente nian inklui diskusaun bilateral nivel aas ho Prezidente, Primeiru-Ministru, no Prezidente Parlamentu Vanuatu nian hodi avansa programa kooperasaun teknika ba Dezenvolvimentu neebe foin aprova.
Hafoin palestra publika iha universidade no serimonia simu tradisional iha Chiefs Nakamal, Prezidente Ramos-Horta sei aranka iha loron 31 Julhu ba Melbourne hodi komemora Aniversariu ba-50 husi loron neebe refujiadu Timoroan sira too ba dala uluk iha rai-Australia.
(eme)
