DILI, STLTIMORLESTE.com – Prezidente Republika (PR), Jose Ramos Horta hatete, nia halao vizita servisu privadu ba Malazia partisipa atividade prinsipal rua.
Prezidente Republika Jose Ramos Horta hatoo lia hirak nee ba jornalista sira iha Aeroportu Internasional Nicolau Lobato, Komoro, Kuarta nee (17/06/2026).
PR hatete, nia viajen privadu ba Malazia hodi lansa livru konaba The Rising Sun Timor Leste Journey to Peace and Development, no hatoo palestra iha Universidade Taylor no Institutu Diplomasia no Relasaun Estranjeiru Malazia nian.
“Hau ba loron tolu iha Kuala Lumpur Malazia ba atividade prinsipal rua, ida halo lansamentu livru, ida kona-ba Timor Leste publikasaun husi akademia diplomasia iha relasaun internasional Ministeriu Negosiu Estranjeiru nian neebe ho kualidade no sira nia ema mak hakerek halo peskiza intervista iha Timor Leste inklui ho hau rasik no lansamentu nee mos ho konferensia ida partisipasaun ho korpu diplomatiku inklui Governu akademiku estudante iha Kuala Lumpur,” dehan Prezidente Republika, Jose Ramos Horta.
Atividade ida seluk mak halo atividade palestra Universidade Taylor nee universidade privadu neebe riku tebes, modernu, mak konvida Prezidente iha fulan kotuk sai hanesan profesor iha neeba nomos sira mos loke eskola ida bolu Eskola Prezidente Ramos Horta para atu fo bolsu estudu ba estudante balun. Estudante Timoroan balun iha neeba ona maibe sei aumenta bolsu estudu ba Timor oan sira nee desizaun husi primeiru Ministru nia.
Aleinde Prezidente Republika mos halo almosu privadu neebe organiza husi Primeiru Ministru Malazia nian, Dato Seri Anwar Ibrahim.
“Hasoru malu mos ho Primeiru Ministru almosu ho nia ho ekipa tomak momentu nee enkontru hotu ho hau nia liu kedas ba Aeroporto ba simeira Rusia ASEAN ke maun boot Primeiru Ministru Xanana mos partisipa iha neeba,” katak Horta.
Aleinde nee halo mos vizita privadu ba labarik Timor oan ida neebe moras baixa iha Hospital Malazia ho moras seriu maibe iha posiblidade halo tratamentu. “Hau sei haree didiak ho Governu para hau hatete ba nia pay Familia hau garante sei halo pagamentu ba hospital para halo tratamentu tinan 2 nia laran nunee bele kura moras nee,” katak PR Horta.
Aleinde iha Malazia, Prezidente Republika mos hetan informasaun katak eis Prezidente Republika Francisco mos halo tratamentu iha neeba normal, no Prezidente ba vizita maibe eis PR Lu Olo iha sala halo tratamentu tanba nee Prezidente hasoru deit mak espoza Eis Prezidente Republika, Dona Cidalia.
“Tratamentu normal ke Prezidente Lu Olo ba halo cek-up ho kondisaun diak hela, ita nuudar Timoroan ida nuudar eis Prezidente ida hau sente obrigasaun tenke ba haree pelumenus koalia ho Espoza,” dehan PR Horta.
Atividade rua nee mak Prezidente Ramos Horta vizita Universidade Taylor, iha neeba iha sesaun dialogu ida ho titulu Mundu ida neebe muda, valor sira neebe dura ba estudante sira, fakuldade no konvidadu sira. Sesaun nee esplora oinsa prinsipiu intemporais hanesan integridade, empatia, reziliensia, no kompromisu ba bem komun bele orienta lideransa iha mudansa teknolojiku, jeopolitiku no sosiedade neebe aseleradu.
Aleinde nee lansa livru ho titulu The Rising Sun Timor-Leste Journey to Peace and Development, neebe hakerek husi Dra. Murni Wan Mohd Nor no ko-autoria husi Nurul Farhah Ab Aziz. Livru nee relata Timor-Leste nia tranzisaun husi okupasaun no rezistensia ba independensia, rekonsiliasaun, no konstrusaun nasaun.
No ohin Prezidente Republika fila hila mai Timor Leste tanba konklui nia vizita iha Malazia hodi hametin lasu entre Timor-Leste no Malazia enkuantu destaka kbiit edukasaun, lembransa, no valor umanu sira neebe partillada.
(eme)
