DILI, STLTIMORLESTE.com – Prezidente Republika (PR), Jose Ramos Horta husu parte hotu atu rezolve dezafiu kona-ba mudansa klimatika, labele hein deit Governu nunee bele konserva bee.
Tuir Komunikadu neebe STL asesu husi media Prezidensia Republika Tersa nee (22/10/2024 ) hatete, Prezidente Republika destaka asaun mudansa klimatika iha akampamentu Nasional juventude.
Xefe Estadu hatete, importansia krítiku ba konservasaun bee no mitigasaun ba mudansa klimatika iha abertura Akampamentu Nasional Permayouth 2024 iha Railaco, munisípiu Ermera. Eventu loron haat neebe organiza husi PERMATIL (Permakultura Timor Leste), halibur joven liu 700 husi nasaun tomak ho tema Kuda Bee Hamoris Komunidade.
Iha biban nee, Prezidente Republika, Jose Ramos Horta louva PERMATIL neebe iha iniativa mobiliza konservasaun bee no mitigasaun ba mudansa klimatika neebe halibur mos joven lubuk ida ho tema kuda bee hamoris Komunidade.
“Ligasaun direta entre bee no moris, husu ba partisipante sira atu foti asaun lalais hasoru mudansa klimatika. Prezidente husu solusaun pratika iha baze, hodi kritika konferensia internasional sira neebe la konsege produs rezultadu tanjível ba komunidade sira,” dehan PR, Horta.
Xefe Estadu louva diretor ezekutivu PERMATIL, Ego Lemos, tanba mobiliza ona apoiu nasional no internasional ba inisiativa nee.
Horta enkoraza partisipante joven sira atu aplika sira-nia aprendizajen husi akampamentu iha sira-nia komunidade uma laran, foka ba tekniku rekuperasaun bee no prezervasaun ambiental.
Akampamentu tinan ida nee, neebe halao iha Suku Kaitarahei, ho objetivu atu fo formasaun ba juventude kona-ba jestaun bee no pratika konservasaun.
Prezidente Republika, Ramos Ramos haktuir tan katak importansia husi lideransa lokal, inklui igreja sira, eskola sira no autoridade munisípiu sira, hodi rezolve dezafiu sira mudansa klimatika nian laho depende deit ba intervensaun sira governu nian.
(eme)
