DILI, STLTIMORLESTE.com — Prezidente Repúblika (PR), José Ramos Horta nomeia Superintendente Asistente Leonela do Rosário Martins nu’udar Adjunta Xefe Kaza Militar, hodi substitui Superintendente Asistente Luís Soares Barreto.
Nomeasaun ne’e halo iha Kinta nee (27/08/2026), iha Palásiu Prezidensiál, bazeia ba Dekretu Prezidente Repúblika N.º 96/2026.
Leonela do Rosário Martins iha esperiénsia servisu liu tinan 20 iha Polísia Nasionál Timor Leste (PNTL), hahú servisu iha tinan 2001.
Durante nia karreira iha PNTL, Leonela hala’o ona kna’ar nu’udar auditora iha Inspesaun Jerál PNTL. Antes nomeasaun ba kna’ar foun, nia servisu nu’udar Adjunta Komandante Munisípiu Ainaro.
Prezidente Ramos Horta hato’o agradese ba Superintendente Asistente Luís Soares Barreto tanba ninia dedikasaun no profisionalizmu durante hala’o kna’ar iha Kaza Militar.
Prezidente mos fó boas-vindas ba Leonela do Rosário Martins no hato’o konfiansa katak ninia integridade no esperiénsia operasionál sei kontribui ba haforsa Kaza Militar.
“Iha tempu hanesan, ha’u hato’o boas-vindas ho laran kmanek ba Superintendente Asistente Leonela do Rosário Martins, ne’ebé nia integridade no esperiénsia operasionál ne’ebé komprovadu ona sei hametin Casa Militar, bainhira ita kontinua serví nasaun ho exelénsia,” dehan Prezidente Ramos Horta.
Prezidénsia hein katak nomeasaun ne’e sei haforsa kapasidade operasionál no asesoria Kaza Militar durante restante mandatu Prezidente Repúblika.
Nia esperiénsia liu tinan rua-nulu iha PNTL mos sei sai kontribuisaun importante atu garante kontinuidade servisu no profisionalizmu iha estrutura apoiu ba Prezidente Repúblika.
(eme)
