DILI, STLTIMORLESTE.com – Prezidente Republika (PR), Jose Ramos Horta promulga ona lei orsamentu retifikativu neebe hatoo husi Parlamentu Nasional.
Prezidente Republika, Jose Ramos ba jornalista sira iha Komoro, Segunda nee (08/06/2026) hatete, nia simu ona lei orsamentu retifikativu husi Parlamentu Nasional iha Sesta no bainhira simu Prezidente Promulga kedas.
“Simu tiha ona, hau taka tiha matan promulga kedas, horiseik ka hodi bainrua kedas, ohin Segunda lae maibe iha Sesta feira nee too ho too hau asina kedas, no entrega kedas ba Primeiru Ministru Kay Rala Xanana Gusmão.
Iha rekomendasaun ruma ba Governu hodi ezekuta orsamentu retifikativu ka lae? Hatan ba kestaun nee Prezidente Republika Jose Ramos Horta hatete, laiha rekomendasaun ruma tanba Governu foti orsamentu retifikativu hodi atende ba krize mundial.
“Laiha rekomendasaun tanba politika neebe Governu halo los tanba infrenta krize mundial impkatu negativu liu ba povu,” dehan PR Horta.
Foin lalais Prezidente Republika hatete, sente kontente tanba Proposta orsamentu retifikativu neebe Governu aprezenta aprova ona iha parlamentu nasional, bainhira submete mai meza Prezidente sei taka matan promulga.
Iha loron Tersa, Parlamentu Nasional (PN) aprova ona Proposta Lei Orsamentu Retifikativu 2026 iha votasaun final global ba espesialidade ho votu afavor 42, kontra 0 no abstensaun 23, liu husi sesaun plenaria neebe halao iha sala plenaria Parlamentu Nasional.
Tuir relatoriu finanseiru neebe aprezenta iha plenaria, kategoria salariu no vensimentu, transferensia publika, kapital menor no kapital dezenvolvimentu ba instituisaun publika sira kontinua mantein tuir alokasaun iha orsamentu anterior. Enkuantu nee, mudansa boot liu akontese iha kategoria bens no servisu korrente, neebe influensia diretamente montante orsamentu ba kada instituisaun.
(eme)
