DILI, STLTIMORLESTE.com – Prezidente Republika (PR), Jose Ramos Horta realiza Resepsaun Diplomatiku Anual iha palasiu Prezidensial, Nicolau Lobato, hodi sublina kompromisu Timor Leste nian ba Building Bridges.
Liu husi diskursu ba korpu diplomatiku sira, Prezidente Republika Jose Ramos Horta destaka realizasaun nasaun nian hanesan nasaun demokratiku liu iha Azia, hetan klasifikasaun 10.º iha nível mundial iha liberdade imprensa, enkuantu fo sai entrada susesu nasaun nian iha Organizasaun Mundial Komersiu (OMK) nian iha tinan 2024.
Iha biban nee, Prezidente relata progresu neebe notavel iha dezenvolvimentu nasional, inklui espansaun ba profesionalizmu saude sira husi mediku nain 21 iha 2002 ba besik 1,300 ohin loron, no kresimentu husi ensinu superior ho universidade 17 neebe agora serve estudante sira maizumenus 60,000.
Nia sublina mos responsabilidade fiskal nasaun nian ho proporsaun divida ba PIB 16% no investimentu infraestrutura signifikativu sira, inklui dezenvolvimentu ida husi setor enerjia ho milhaun US$ 400 neebe atinje besik 100% husi teritoriu nasional.
Destake boot ida tinan kotuk nian mak Papa Francisco nia vizita istorika, neebe Prezidente Ramos Horta deskreve nuudar transformadora ba nasaun.
Eventu nee hatudu Timor Leste nia kapasidade organizasional no hametin nia pozisaun internasional bainhira nasaun nee prepara ba adezaun tomak ba ASEAN iha tinan 2025.
Resepsaun neebe hatudu espozisaun textil no pintura Tais neebe hetan rekonesimentu husi UNESCO, konklui ho Prezidente konvida reprezentante diplomatiku sira hodi esplora Lauhata iha Munisípiu Likisa, hodi hatudu kompromisu Timor Leste nian hodi hatudu nia beleza natural no potensial turístiku ba komunidade internasional.
Bainhira remata realiza reseisaun Anual Diplomatiku ba tinan 2025, Prezidente Republika Jose Ramos Horta konvida Diplomata sira vizita programa reira Tais Timor iha Palasiu Prezidensial laran.
(eme)
