DILI, STLTIMORLESTE.com – Jurista Timor oan konsidera katak, ohin loron kazu pendente kontinua eziste iha Tribunal sira, tanba nee presiza meius hodi redus.
“Hau hanoin kazu pendente kontinua eziste iha Tribunal sira, kauza ida bele mai husi ita nia numeru rekursu umanus neebe seidauk sufisiente, tanba nee sai mos hanesan faze ida hodi halo kazu pendente kontinua eziste,” dehan Jurista Jose Maria Guterres ba STL iha Kaikoli, Sesta (21/08/2026).
Nia hatutan, kazu pendente atu redus presiza iha programa julgamentu movel, aumenta tan numeru rekursu umanus iha sektor justisa, hodi nunee bele redus kazu pendente.
Profunda tan, kazu pendente kontinua iha sai preokupasaun ema hotu nian, tanba iha publiku balu kestiona tanba sira nia kazu tama iha Tribunal maibe ho julgamentu kleur, ida nee mos bele sai preokupasaun ida.
Iha fatin ketak, Akademiku UNTL, Sebastião dos Santos dehan, presiza redus kazu pendente atu labele sai perokupasaun publiku nian.
“Hau hanoin presiza redus kazu pendente atu labele sai preokupasaun publiku nian, sentru formasaun bele kontinua kria programa atu kontinua loke konkursu, nunee kandidatu sira bele konkore ba sentru formasaun, atu bele aumenta numeru rekursu umanus ba iha autor judisiariu,” dehan nia.
Afirma, bele iha edifisiu maibe la iha numeru rekursu umanus neebe sufisiente, sei labele redus kazu pendente. Tanba nee presiza duni aumenta numeru rekursu umanus ba iha setor justisa.
Aleinde nee, Prezidente Tribunal Rekursu, Afonso Carmona dehan, kazu pendente laos kazu nee rai hela, maibe nia prosesu julgamentu lao hela seidauk iha desizaun.
“Prosesu pendente laos prosesu la lao, maibe prosesu julgamentu lao hela, dala ruma sei rona sasin sira, ida nee mak seidauk iha desizaun prosesu sei pendente,” dehan nia.
Afirma tan, ho rekursu sira neebe iha, ba oin bele aselera kazu pendente, tanba nee mak programa julgamentu movel iha munisipiu sira kontinua funsiona.
(ter)
