DILI, STLTIMORLESTE.com – Moris iha sosiedade sempre iha problema, maibe husi kultura beiala sira husik hela ona katak, bainhira iha problema ruma nahe biti boot hodi rezolve, laos uza katana ho tudik se ba malu.
“Presiza promove kultura nahe biti boot hodi rezolve problema, ida nee ita nia beiala sira husik hela ona mai ita, uluk bainhira iha problema ruma sira sempre bolu malu tuur hamutuk hodi bele rezolve fo sala malu bainhira ida sala, hanoin hahalok ida nee presiza promove,” dehan Ativisista Feto Hanesan Mos Dosente, Judite Dias ba STL, iha Kaikoli, Dili, Kuarta nee (23/10/2024).
Nia hatete, bainhira iha problema mak uza violensia nee kontra ona direitu umanu, tanba nee tenke hatan tuir lei neebe mak vigora iha Republika Demokratika Timor Leste, tanba nee mak diak liu iha problema ruma bolu malu rezolve tuir kultura nahe biti boot.
Nunee mos Prezidente Konselhu Diretoria Rede Feto Timor Leste, Zelia Fernandes hatete, sosiedade sempre iha liafuan ida lori lia ba mai ou informasaun Hoax nee sempre, maibe sempre fila fali ba jestaun uma laran feen laen hodi haree kazu nee ho ulun malirin, nee mak imporante.
Dezde uluk inan aman ka beala sira ita haree katak nahe biti boot nee kultura ida koalia ba malu nee kultura ida, haree didiak valores kultura neebe mak diak liu-liu nahe biti tuur hamutuk atu koalia ba malu.
“Nahe biti nee tuur hamutuk atu koalia ba malu, koalia too baku malu, diskuti malu laiha problema importante liu meius ida nee koalia ba malu, krimi ka violensia nee laos dalan atu bele koalia malu ou rezolve problema, nee mak ita sempre koalia beibeik ida nee mak sai kultura ida mos hakribi violensia nee sai hanesan kultura ida mos ba ita, la fasil atu hakotu ema ida nia vida nee mak importante,” katak nia.
Nia hatete, atu dehan katak bainhira iha problema labele nonok koalia ba malu hatoo ba malu para bele buka solusaun, se nonok hela deit problema sai boot mak foin hakfodak dehan ibformasaun nee rona husi ida nee no ida neeba ida nee tarde ona.
Nunee mos Advokacay Programa Manajer husi Fundasaun Alola, Maria Evelina hatutan, karik iha problema iha familia presiza tuur hamutuk hodi rezolve problema.
Nia hatete, karik iha problema ruma bolu malu tuur hamutuk hodi rezolve ho ulun malirin labele uza violensia hodi rezolve ida nee laiha benefisiu iha familia nomos iha sosiedade nia leet, tanba nee mak diak liu rejolve ho ulun malirin, buka malu husu deskulpa ba malu ou bolu malu nahe biti hodi rezolve.
(eme)
