DILI, STLTIMORLESTE.com – Prezidente Parlamentu Nasional (PPN), Maria Fernanda Lay presta omenajen ba saudozu eis Prezidente Republika Francisco Guterres Lu-Olo ih rezidensia Farol, Dili.
Prezidente Parlamentu Nasional too iha rezidensia saudozu nia iha tuku 13:00 resin, hodi presta omenjen ba saudozu Francisco Guterres “Lu-Olo”.
Hafoin remata presta omenajen, Prezidente Parlamentu Nasional, Maria Fernanda Lay ho matan-been deklara katak Timor Leste (TL) lakon aset estadu nian no figura boot ida, tanba rai hela memoria barak ba nasaun nee.
“Aset boot nasaun neebe ita lakon maibe ita fiar katak nia hanesan aset, nia rai memoria ida neebe mak diak teb-tebes, ita espera katak memoria nee ita bele mantein ba futuru nasaun ida nee nian”, dehan nia ba jornalista sira iha rezidensia saudozu nian iha Farol, Tersa (23/06/2026).
Nia hatutan, saudozu Francisco Guterres Lu Olo laos deit aset familia nia maibe aset estadu nian, tan nee ho nia mate nee hanesan lakon boot ida ba nasaun Timor Leste, Partidu FRETILIN liu-liu ba familia tanba durante nee tau matan ba feen ho oan sira.
Nia espera katak Maromak sei fo forsa nafatin ba familia liu-liu ba espoza bele tau matan ba nia oan sira.
Nia akresenta tan, saudozu hanesan aset estadu nian, tan nee saida mak nia husik hela ona, jerasaun tuir mai neebe mak sei fo kontinuidade valoriza teb-tebes tanba iha momentu neebe difisil saudozu bele deriji Parlamentu Nasional.
“Hau hanoin katak memoria ida nee ami hanesan deputadu tenki konsdira nafatin, iha prosesu lejislasaun liu-liu ami nia atetude neebe, ita nia eroi nasional ida nee fo ezemplu ida neebe diak tebes iha momentu neeba, hau espera katak nia figura bele inspira ami para bele respeita malu iha Parlamentu nasional,” adianta nia.
(alb)
