DILI, STLTIMORLESTE.com – Prezidénsia Repúblika (PR) hahú fulan Outubru ho serimónia isar Bandeira Nasionál, iha Palásiu Prezidensiál Nicolau Lobato.
Serimónia ne’e lidera husi Xefe Kaza Sivíl, Henriqueta Maria da Silva, no partisipa husi diretór, xefe departamentu, asesór, pesoál militár no funsionáriu públiku.
Atividade ne’e hala’o iha resintu Palásiu Prezidensiál, Segunda (05/10/2026) nu’udar parte husi tradisaun fulan-fulan Prezidénsia Repúblika nian.
Partisipante sira hamutuk iha serimónia ne’e hodi fó onra ba Bandeira Nasionál, nu’udar símbolu unidade, soberania no identidade povu Timor-Leste.
Serimónia isar bandeira mos sai momentu importante ba funsionáriu sira atu hahú servisu iha fulan foun ho responsabilidade no dedikasaun.
Iha atividade ne’e, funsionáriu sira hatudu solidariedade no espírito servisu hamutuk, hodi kontinua hala’o knaar públiku ho dixiplina no integridade.
Além husi aspeto ofisiál, serimónia ne’e mos fó espasu ba funsionáriu sira atu reafirma sira-nia kompromisu ba interese Estadu no povu.
Iha serimónia, funsionáriu hotu-hotu uza tais tradisionál, nu’udar forma ida atu valoriza identidade no eransa kulturál Timor-Leste.
Tais nu’udar patrimóniu kulturál ne’ebé importante ba Timor-oan, tanba nia reprezenta identidade, tradisaun no diversidade kulturál husi komunidade sira.
Akompaña husi Grupu Korál Prezidénsia, partisipante sira kanta Hinu Nasionál hamutuk iha atmosfera solene no ho sentimentu patriotizmu.
Kanta Hinu Nasionál iha momentu ne’e hametin tan sentimentu unidade entre funsionáriu sira ne’ebé servisu iha instituisaun Prezidénsia Repúblika.
Tradisaun isar Bandeira Nasionál iha inísiu fulan mos importante atu lembra funsionáriu sira kona-ba responsabilidade sira-nia knaar ba Estadu.
Serimónia ne’e la’ós de’it atu hahú fulan foun, maibé mos sai símbolu kona-ba kompromisu atu serbí Timor-Leste ho onestidade.
Iha kontestu servisu públiku, dixiplina, integridade no responsabilidade konsidera nu’udar valor importante atu asegura servisu ba povu lao ho di’ak.
Partisipasaun husi pesoál militár, funsionáriu públiku no ofisiál sira husi departamentu oioin mos hatudu kooperasaun iha estrutura Prezidénsia Repúblika.
Ho serimónia ne’e, Prezidénsia Repúblika hahú fulan-Outubru ho espírito unidade, patriotizmu no kompromisu foun atu kontinua servisu ba nasaun.
(car)
