DILI, STLTIMORLESTE.com – Relasiona ho akontesimentu neebe akontese iha Oecusse, hodi rezulta prizoneiru ida halai ses husi Guarda Prizional sira nia liman, mak Ministru Justisa (MJ) hatun ona despaisu ba iha Diretor nain 2 hodi halo investigasaun.
“Prosesu averiguasaun hau instrui ona ba iha Direktor Jeral Servisu Prizional Politika Justisa, no mos Direktor Nasional atu halo lai averiguasaun relatoriu ida mai, tanba sa maka ema nee bele halai, ita nia responsabilidade oinsa, tanba sira nee hetan formasaum atu hasoru kualker rekuzu prizoneru sira nusa ida nee akontese,” dehan Ministru Justisa, Sergio Hornai ba jornalista sira foin lalais nee.
Hatan konaba informasaun dehan, guarda sira hasai rekuzu nee tur iha liur la uja alsema maka halai, MJ dehan labele loke lai konkluzaun sei hetan fali fontes informasaun kompletu, sei hetan relatoriu neebe hato husi Direktor nain rua, foin bele loke konkluzaun ida. No informasaun pre leminar neebe iha, bele loke tan hanoin ida, hodi hare konaba investigasaun neebe iha, hodi hatene konaba velosidade problema nee.
Esplika, momentu rekuzu nee halai ses, iha kalan nee kedas simu informasaun husi Direktor Nasional Servisu Prizional sira nian, informa ba MJ iha Oecuse, situasaun ida Prizoneru halai banhira atu ba hasoru julgamentu ida iha neeba, maibe nia halai ses tiha.
Sublina, relatoriu kompletu seidauk simu, maibe fo ona orientasaun atu halo kordenasaun ho Instituisaun Estadu nian atu hare oinsa atu halo desmantelamentu, hodi nunee halo medida tuir lei haruka hodi hetan fila fali prizoneru refere.
MJ hatutan, se karik maka nia iha ita nia teritoriu nasional sei halo vijilansia, servisu ho aparelu sira neebe iha kordena atu deteta nia paraderu, hodi halo medidas ba nia, atu halo reintegrasaun fali ba servisu prizional nian.
Esplika, iha konsekunesia tanba nia tenta halai husi nia responsabilidade, sei iha medida balu hanesan tuir sira nia lei, medida konaba pena nian nia sei hetan iha futuru.
Akresenta tan, rekuzu nee iha hela Prizaun Bekora, atu ba tuir julgamentu iha Tribunal Oecuse, maka rekuzu nee halai ses.
Iha fatin ketak, Akademiku UNTL Sebastiao dos Santos dehan, presija halo investigasaun klean, tanbasa maka prizoneru ida bele halai ses husi Guarda sira nia liman.
“Guarda sira nia servisu maka tau matan ba dadur sira, tanba sa maka dadur nee bele halai ses, ida nee presija investiga klean,” dehan nia.
Hatutan tan, ida nee sai hanesan esperiensia ida, atu ba oin guarda sira tenke asegura prizoneru sira banhira iha julgamentu, hodi labele akontese tan hanesna nee.
Antes nee, tuir Kronolojia akontese prizioneiru nee halai iha semana kotuk husi Dili ho kareta prizaun, lori detendidu atu tuir julgamentu iha tribunal Primaria Instansia Distrital Oecusse, maibe sedauk too loron julgamentu, derpente lakon husi Guarda Prizioneiru nain 3 Nia Liman iha Tribunal Oecusse.
(ter)
