DILI, STLTIMORLESTE.com – Relasiona ho ezame segundu periodu nian neebe sei halao iha loron 13 Julhu tinan nee, administrasaun kurikulu eskola nian avizu ba profesor kada disiplina sira atu prepara total pontus ezame nian.
Profesor Eskola Pre-Sekundario Colegio São Jose Operario, Silverio da Costa hatete, preparasaun ba ezame segundu periodu nee, daudaun nee profesor husi kada disiplina sira hahu entrega visa ezame ba kurikulu eskola, neebe mak antes nee fo sai no avizu ona ba profesor sira iha eskola.
Nia katak, materia neebe estudante sira hetan iha fulan 3 nia laran nee, profesor sira halo fali rezumu hodi fo prova diariu no oral ba estudante sira. Nee mak kada profesor disiplina tenke halo fali rezumu hodi fo ba sira estuda iha uma.
Ami profesor sira daudaun nee, husi disiplina ida-idak ami halo ona total pontus ezame nian, no hatama ona visa ezame ba kurikulu eskola nian. Nunee mos bá estudante sira, ami profesor sira halo rezumu fo hodi fo prova bá estudante sira no haruka estuda makaas,” dehan nia ba STL iha Balide, Segunda (22/06/2026).
Nia hatutan, husu bá estudante sira uza tempu ho diak hodi estuda materia sira neebe profesor sira fo ona, atu nunee iha ezame segundu periodu nee bele hetan rezultadu neebe diak. Husu bá inan aman sira atu kontrola no akompana oan sira hodi estuda iha uma.
Nunee mos Estudante Setimu Ano husi Eskola Katólika Sao Pedro hatete, falta deit semana 2 ho balun tama bá ezame segundu periodu nian, tanba nee agora dadaun Profesor kada disiplina sira haruka estudante sira foto kopia rezumu. Iha fulan nee, nakonu ho pratika bá disiplina biologia no muzika, nunee mos prova oral no diaria husi profesor kada disiplina sira. Baibain ezame periodu nian nee, materia neebe seidauk kompletu, profesor sira uza fali bá tempu dader, tanba SMP eskola loraik.
“Ami loron-loron sempre halo deit prova Sira hanesan prova oral no diaria, hodi fo hanoin fali mai ami para estuda bá preparasaun izame segundu periodu nian no faze ida hodi hadia ami nia valor iha ezame mai,” dehan nia.
Nia hatutan, bainhira profesor kada disiplina sira halo ravista apontamentus, se karik estudante balun neebe seidauk halo kompletu, tenke halo kompletu fali materia sira nee, para bele estuda hodi prepara aan iha ezame tuir mai.
Nunee mos Merita Barreto nuudar Inan husi Estudante EBF 5 Komoro hatete, loron bá ezame segundu periodu nian besik ona, falta deit semana rua resin labarik sira ezame ona, inan aman ida-idak tenke haruka no akompana oan sira estuda iha uma ho diak, atu nunee bele sira bele priense perguntas neebe iha surat tahan laran ho diak.
(dom)
