DILI, STLTIMORLESTE.com – Bolsa Kandidatu Profesores hamutuk 200 resin neebe daudaun nee hanorin iha eskola sira iha Munisípiu Bobonaro laiha hela fatin, no kada fulan selu kos US$ 50.
Kestan nee hatoo husi Diretor Servisu Edukasaun Munisípiu Bobonaro, Miguel Freitas ba STL liu husi telefone, Kuarta nee (08/04/2026).
“Kona-ba sira nian hela fatin nee provizoriu, sira sei aluga komunidade sira nia uma kada fulan sira selu US$ 50, tanba sira aluga uma, maibe ida nee difikuldade boot. Hau aprezenta ona ba iha ministériu atu bele tau konsiderasaun ba sira, tanba sira dala ruma hela fatin nee hamutuk ho komunidade,” katak nia.
Miguel akresenta, bolsa kandidatu profesores maioria mak aluga uma, maibe sira 200 resin mak aluga uma, kada fulan selu US$ 50, hatoo ona ba ME nasional, maibe seidauk fo resposta, profesores 200 resin nee husi nivel pre eskolar, ensinu baziku, sekundariu no tekniku vokasional.
Iha fatin seluk, Diretor Servisu Edukasaun Munisipiu Ainaro, Patricio da Costa Magno antes nee dehan, bolsa kandidatu profesores neebe mak ba iha primeiru ita iha 42, segundu 43, sira maioria mak aluga deit uma, neebe 40 hanesan nee mak aluga uma, seluk ita seidauk hatene, tanba balun sei hela iha komunidade nia uma.
“Hau hanoin ita nian bolsa kandidatu profesores neebe mak ba iha primeiru ita iha 42, segundu 43, sira maioria mak aluga deit uma, neebe 40 hanesan nee mak aluga uma, seluk ita seidauk hatene, tanba balun sei hela iha komunidade nia uma, tanba ita nian komunidade fo deit uma ba sira, tanba nee nain 40 mak aluga uma, dala ruma sira nain 2 ou 3 mak aluga hamutuk uma ida, tanba too agora ita seidauk iha rezidensia ba sira,” dehan nia.
Nia dehan, ezemplu uma boot ida sira nain 4 ou 5 aluga hamutuk deit, nee sira selu hamutuk, ida nee mak ohin temi ona, profesores nain 40 mak aluga komunidade sira nian uma, maibe balun komunidade ajuda deit, fo uma mamuk ba profesor sira nee hela hodi halao sira nian servisu liu husi prosesu ensinu aprendizajen.
“Iha ami nian area neeba, ita presiza tebes sira atu bele hanorin ita nia oan sira, ho ida nee mak ita nian komunidade ida rua fo netik uma ba sira hela, nee duni daudaun nee ami nian profesores bolsa kandidatu neebe mak koloka ba Ainaro hamutuk 88, nee seidauk sufisiente, tanba iha eskola ida rua mak ita presiza atu aumenta tan profesores, liu-liu ensinu baziku no filial sira,” nia esplika.
(jac)
