DILI, STLTIMORLESTE.com – Profesores husi Ensinu Baziku Filial (EBF) Vila-Verde halo sumáriu loro-loron kona-ba matéria ne’ebé sira hanorin no nafatin fo importánsia ba disiplina no pontualidade iha prosesu ensinu aprendizajen.
Tuir Koordenadora Ensinu Baziku Filial (EBF) Vila-Verde, Josefina Maia ba STL iha nia fatin servisu, Tersa nee (15/09/2026) dehan, profesores sira hanorin estudantes tuir planu ne’ebé eziste no halo sumáriu loro-loron kona-ba matéria ne’ebé sira hanorin.
Nia esplika, dala ruma mentor lokal sira mai kada semana ida ka semana rua atu halo observasaun no akompaña professores iha sala laran. Inspetor eskolar sira mos mai halo inspeksaun atu haree prosesu hanorin lao tuir orientasaun ka lae.
“Inspetor sira dala ruma semana rua mai dala ida. Sira la mai loroloron, maibé kada semana sira sempre mai hodi akompaña no observa professores sira iha sala laran, atu haree oinsá professores sira hanorin, lao tuir matadalan ka lae. Hau nafatin fo orientasaun ba sira, liu-liu kona-ba disiplina no pontualidade. Profesores sira tenke mai antes oras, tanba pontualidade importante tebes,” nia dehan.
Nia hatutan, EBF Vila-Verde iha sala aprendijazen hamutuk neen deit, nune’e eskola tenke organiza turnu tolu atu bele responde ba nesesidade estudantes sira.
Nia argumenta, kada nivel iha turma A, B no C, enkuantu ba terseru ano iha ona turma A to’o D. Ba kuartu no kintu ano iha turma A to’o C, enkuantu sesto ano iha turma A no B.
“Ami nian estudantes kuartu ano A to’o C, kintu ano A to’o C, no sesto ano A no B. Tanba sala neen deit, entaun ami halo turnu tolu, atu bele responde no labarik sira hotu bele asesu ba prosesu ensinu no aprendizajen,” nia esplika.
(jac)
