DÍLI, STLTIMORLESTE.com – Profesores iha Eskola Sekundária Nobel da Paz kontinua hala’o prosesu ensinu-aprendizajen tuir oráriu no planu aula ne’ebé estabelese ona husi eskola.
Fundador no atual Diretor Eskola Sekundária Nobel da Paz, Jeremias P. de Jesus hatete ba STL, Segunda-feira (05/10/2026), katak profesores sira kumpri oráriu hanorin no prepara planu aula molok hala’o aprendizajen ba estudantes.
“Durante ne’e ami nia profesores sira hanorin estudantes tuir oráriu ne’ebé iha ona. Dader sira mai tama aula no ida-idak halo sira nia planu aula, tanba ita sai edukador presiza halo planu aula. Nune’e, dader mai ita hala’o aprendizajen ba ita nia estudantes sira,” dehan Jeremias.
Jeremias hateten, profesores sira tenke hanorin tuir planu aula ne’ebé prepara ona, no kumpri oráriu ne’ebé determina husi eskola, atu prosesu aprendizajen bele lao ho di’ak.
“Dader hanorin tuku hira, professores sira kumpri ona sira nia dever, mai sedu atu bele hahú aprendizajen ba estudante sira,” nia hateten.
Nia mós esplika katak, bainhira professor ida hasoru difikuldade ruma ne’ebé halo nia la bele tama aula, tenke fó informasaun ba parte administrasaun eskola atu bele koordena no buka solusaun.
“Bainhira iha difikuldade ruma, ami nia professores sira pasa hela informasaun mai parte eskola atu bele hatene. Tanba ita presiza kordena malu. Karik la tama, presiza fó informasaun mai ita nia eskola,” dehan Jeremias.
(jac)
