DILI, STLTIMORLESTE.com – Profesores ne’ebé hanorin iha área remota iha Munisípiu Bobonaro hasoru difikuldade iha transporte, liuliu tanba kondisaun estrada no distánsia entre fatin hela ho eskola.
Diretor Servisu Edukasaun Munisipiu Bobonaro, Miguel Freitas, hato’o informasaun ne’e ba STL liuhusi via-telefone, Tersa-feira (06/10/2026).
Nia hatete katak, problema transporte sai preocupasaun ba professores ne’ebé hanorin iha área remota, tanba sira la fasil asesu ba transporte.
“Profesores sira nian hela fatin seidauk responde. Dala ruma sira mos ladún asesu ba transporte, tanba ita nia profesores hanorin iha área remota. Ida ne’e mak difikuldade ne’ebé professores sira hasoru,” nia dehan.
Miguel esplika katak, kondisaun estrada aat obriga professores balun lao ain antes asesu ba transporte. Distánsia entre fatin hela no eskola mós naruk, liuliu ba professores ne’ebé servisu iha área besik fronteira ho Indonézia.
Nia hatete katak, situasaun ba profesores ne’ebé hanorin iha área vila relativamente diak liu, kompara ho sira ne’ebé servisu iha área remota.
Tuir Miguel, governu agora prepara hela rezidénsia ba professores atu ajuda fasilita sira ne’ebé hanorin iha área remota.
“Ida ne’e mak husu governu atu prepara hela fatin ba ita nia professores, rezidénsia ba professores, ne’ebé agora ita nia governu prepara ona, hodi fasilita ita nia professores ne’ebé hanorin iha área remota,” nia hatete.
(jac)
