DILI, STLTIMORLESTE.com – Tinan ida nee Ministeriu Edukasaun (ME) liu husi Rekursu Umanu koloka ona profesores nain ualu (8) ba eskola Sekundáriu Jeral nu. 4 de Setembro, hodi substitui profesores nain lima (5) neebe reforma ona.
Dehan Diretor Eskola Sekundariu Jeral nu. 4 de Setembro Balide, Sergio A. da Cruz ba STL iha nia knaar fatin Balide, Segunda nee (22/06/2026),
Nia afirma, kona-ba profesores reforma hirak nee husi sira nian eskola nain lima, maibe laiha problema ba profesores sira, tanba foin daudaun nee husi ME haruka tan profesores bolsa kandidatu nee nain ualu mai iha sira nian eskola.
“Foin daudaun nee husi Ministeriu Edukasaun koloka ona ita nian bolsa kandidatu profesores nain ualu mai iha ami nian eskola, atu nunee bele substitui hikas ita nian profesores nain lima neebe tama ona idade reforma ninia, tuir disiplina neebe profesores reforma nee durante nee hanorin ita nian estudantes sira iha eskola,” nia esplika.
Sergio dehan, profesores nain lima mak reforma ona iha tinan nee no ita substitui ona iha sira nian fatin, sira nian lima nee hanorin iha disiplina português, english, teknolojia multimedia, nain ualu neebe substitui ona nee atu bele reforsa liu tan profesores neebe idade no balun neebe mak moras.
“Ami nian dezafiu seluk neebe mak ami infrenta mak kona-ba tempu udan mosu inundasaun iha ami nian eskola, nee kada tinan sempre fo impaktu ba labarik sira iha prosesu aprendizajen ninia nomos ita nian komunidade sira neebe mak agora daudaun sei hela nafatin iha areador eskola ninia,” tenik nia.
Nia akresenta, agora daudaun total profesores neebe ativu hanorin iha Eskola Sekundáriu nu. 4 de Setembro Balide hamutuk 81, estudantes 1737, sala aprendizajen dader nian 24 meudia nian 24.
Entretantu Diretor Eskola ESTV-IT 28 de Novembro Becora-Díli, Tomas Pinto hatete, maske iha eskola balun profesores nee sufisiente ona, maibe husi sira nian eskola too agora sei menus profesores ba area produtivu ninian, tanba nee husu ba ME, ba oin presiza halo kolokasaun profesores ba iha sira nian eskola.
“Maske iha eskola balun profesores nee sufisiente ona, maibe husi sira nian eskola too agora sei menus profesores ba area produtivu ninia, tanba nee husu ba ME ba oin presiza halo kolokasaun profesores ba iha ami nian eskola,” nia deklara.
Hatan ba Asuntu nee, Diretor Nasional Rekursu Umanu iha ME, João Amaral hatete, ho rekrutamentu bolsa kandidatu profesores neebe ME halo, hodi halo kolokasaun profesores ba eskola neebe sei menus profesores, atu nunee bele halao prosesu aprendizajen ba estudantes sira iha eskola ida-idak.
“Ita nafatin rezolve ita nian eskola neebe sei menus profesores, tanba ho rekrutamentu bolsa kandidatu profesores neebe ME halo hodi halo kolokasaun profesores ba eskola neebe sei menus profesores, atu nunee bele halao prosesu aprendizajen ba estudantes sira iha eskola ida-idak,” katak nia.
(jac)
