DILI, STLTIMORLESTE.com – Servisu Edukasaun Munisipiu Liquiça la halo identifikasaun ba profesores neebe hanorin ho distansia dook, tanba profesor sira tenke hatene ninia oras hanorin estudantes sira.
Haktuir Diretor Servisu Eduksaun Munisipiu Liquiça, Julio da Silva ba STL liu husi telefone, Sesta nee (31/07/2026).
“Hau hanoin ami la halo identifikasaun konaba ita nian profesores sira nian distansia hanorin nee nee dook ka besik, tanba ita nian profesores sira tenke hatene ona katak, ninia oras atu hanorin estudantes nee tuku hira, nee ita nian profesores ida-idak tenke hatene ida nee, para dader tama sedu eskola, hodi halao ensinu aprendizajen ba ita nian estudantes sira, tanba nee ami la identifika ida nee,” nia dehan.
Julio hatutan, SEM Liquiça la identifika profesores nain hira mak distansia hanorin nee dook ka besik, nee sira la halo identifikasaun konaba ida nee, maibe profesores ida-idak hatene ona sira nian oras servisu, hanesan oras hanorin estudantes sira nee, dader tama sedu eskola, nee profesores sira hatene ida nee.
Iha parte ketak, Miguel Freitas nuudar Diretor Servisu Edukasaun Munisipiu Bobonaro, profesores sira nee balun neebe hanorin estudantes sira ho distansia neebe mak dok, depois sira seidauk iga rezidensia.
“Konaba distansia no sira nian hela fatin nee atende ona balun, tanba iha eskola lima ka nen iha ona planu atu tau rezidensia ba Ita nian profesores sira nee iha eskola idak-idak, nee ba tinan ida nee, ezemplu hanesan eskola Sira iha Munisípiu Bobonaro, hanesan hau ba, kolimau, palaka, Postu Kailaku, Bobonaro, nee iha hotu, nee trasa hotu ona, nee ba ita nian profesores bolsa kandidatu sira nian fatin, nee ba Ita nian professores nibel ensinu baziku ninia,” dehan nia.
Miguel akresenta, nee duni rezidensia nee sei tau uluk prioridade ba bolsa kandidatu profesores neebe mak hanorin iha area remotas ho distansia sira nian hela fatin no eskola neebe dook, planu ida nee husi parte infraestrutura nasional, sira mak hatun despaisu ida nee mai, nee planu 2026 nian katak, atu halo rezidensia ba profesores sira iha eskola neen ka hitu, depois mak sei halo kontinuasaun.
Iha fatin seluk, Diretor Servisu Edukasaun Munisípiu Ainaro, Patricio da Costa Magno katak, manorin bolsa kandidatu husi eskola sira iha Munisípiu Ainaro kestiona sira laiha rezidensia ba Servisu Edukasaun Munisípiu Ainaro, tanba durante sira aluga uma no balun komunidade mak oferese fatin ba sira.
“Ita nia manorin sira nee balun kontinua aluga uma, balun mak komunidade oferese fatin ba sira, sira hatoo mak too agora rezidensia seidauk iha nee, ita hatoo planu ba iha ME atu halo kada postu, kada eskola neebe mak bolsa kandidatu koloka ba nee, maibe too agora seidauk, ita nian bolsa kandidatu aluga uma nee barak,” nia deklara.
(jac)
