BAUCAU, STLTIMORLESTE.com – Programa Merenda Eskolar faze terseiru iha Munisipiu Baucau seidauk bele implementa, tanba Autoridade Munisipiu Baucau seidauk aloka orsamentu ba eskola 16. Kondisaun refere fo impaktu ba eskola sira seluk neebe hetan ona alokasaun orsamentu.
Diretor Servisu Munisipal Edukasaun Baucau, Afonso dos Santos da Costa esplika, preparasaun ba implementasaun Programa Merenda Eskolar faze terseiru nian, iha fulan Julhu 2026, antes remata ezame segundu periodu, Servisu Munisipal Edukasaun diriji ona pedidu orsamentu ba Autoridade Munisipiu Baucau atu aprova no halo alokasaun orsamentu sedu ba konta bankaria eskola sira.
Maibe too agora eskola balun seidauk hetan alokasaun orsamentu, nunee implementasaun programa refere mos seidauk hahu.
“Too agora iha ona aprovasaun maibe agora osan nee mak ita haree seidauk tama konta bankaria, tanba ami konfirma eskola 16 mak konta bankaria sei mamuk,” hateten Afonso dos Santos da Costa ba STL iha nia knaar fatin, Vila Nova Baucau, Sesta (21/08/2026).
Nia katak, iha razaun balu neebe halo konta bankaria eskola 16 seidauk iha osan, tanba Autoridade Munisipiu Baucau iha servisu barak, maibe asuntu refere sei hetan resposta iha tempu besik, tanba Servisu Munisipal Edukasaun kontinua halo konfirmasaun atu implementasaun programa refere bele lao lalais, hodi atinji loron efetivu neebe determina ona iha kalendariu implementasaun programa.
Nia rekonhese, implementasaun Programa Merenda Eskolar ba anu letivu 2026 iha Baucau, iha meta loron efetivu hamutuk 150, maibe too agora foin atinji loron efetivu 70, neebe kobre husi primeiru no segundu periodu no posibilidade programa la atinji total loron efetivu, maibe sei halo esforsu atu atinji meta 150 loron efetivu.
“150 dias nee hau seidauk koalia too nia impaktu nee, mais hanesan hau dehan ita antisipa kedas ona entaun ita esforsu para implementa hotu iha tempu efetivu nee. Neebe too Outubru no Novembru mak ita haree took, mais ita nia tarjetu ita hakarak 150 dias nee tenke,” Afonso katak.
Iha fatin ketak, Diretor EBC Vila Nova Baucau, Francisco Pinto hateten, atrazu implementasaun Programa Merenda Eskolar mos sai parte husi relatoriu eskola balu ba Servisu Munisipal Edukasaun, atu diriji ba Autoridade Munisipal hodi aprova lalais.
“Implementasaun atrazu tanba osan sai atrazu. Tanba kolega balu seidauk kompleta, maibe ami nian kuandu osan iha ona, ami implementa ona, mezmu sira seluk nee atrazu,” katak Francisco Pinto.
Tuir nia, orsamentu ba Programa Merenda Eskolar faze terseiru nian tama ona iha konta bankaria eskola neebe submete ona relatoriu, maibe programa seidauk bele implementa, tanba seidauk iha orientasaun atu foti no uza orsamentu.
“Osan ami nian tama tiha ona, maibe seidauk iha orientasaun, entaun seidauk bele foti. Tanba balu hatama sira nia relatoriu, entaun atrazu oituan, seidauk envia ba PAM, entaun PAM seidauk despaisa osan ba ida nee,” hateten Diretor EBC Vila Nova Baucau.
Liga asuntu nee, STL tenta atu konfirma Prezidente Autoridade Munisipiu Baucau, Veneranda Lemos, maibe la hetan komentariu, tanba Prezidente Autoridade Munisipiu Baucau atual iha hela Dili.
Entretantu, dadus neebe antes STL hetan hatudu katak, estudante benefisiariu Programa Merenda Eskolar ba anu letivu 2026 iha Munisipiu Baucau liu rihun 34, kompostu husi Pre-Eskolar, Ensinu Baziku Primeiru, Segundu no Terseiru Siklu. Programa nee planeia atu halao durante loron efetivu 150, ho orsamentu hamutuk US$2,788,690.
(tom)
