BAUCAU, STLTIMORLESTE.com – Projetu reabilitasaun estrada rural Kilometru (Km) 19 neebe responsabiliza husi kompanhia Naoheti Unidas Unipessoal, Lda tinan 10 ona seidauk finaliza, iha neebe projetu nee mos seidauk hetan kontratu husi Governu.
Diretor kompanhia Naoheti Unidas Unipessoal, Lda, Adolfo Canizio aprezenta, estrada kilometru 19 refere hahu kobre husi area Sukaer laran, Suku Vemasse, Postu Administrativu Vemasse, Munisipiu Baucau too iha area Uaimori Tula Munisipiu Viqueque, iha neebe servisu reabilitasaun estrada nee implementa iha tinan 2015 mezmu too ohin loron kompanhia sei halao servisu iha terrenu, maibe seidauk finaliza, tanba parte Ministeriu Obras Publikas (MOP) mak haruka kompanhia hein kompeta dokumentus balu.
“Ami lao hela parte Obras Publikas mak haruka hein oituan razaun mak dokumentus balu sei hadia hein ita nia Primeiru Ministru lansa,” hateten Diretor kompanhia implementador projete refere ba STL liu husi telefone, Sesta (22/05/2026).
Nia esplika, razaun dezenhu BoQ husi kompanhia remata hotu ona, tanba servisu lao tiha ona no laiha kuadru projetu iha servisu fatin, tanba seidauk hetan kontratu husi Governu, maibe sei prosesu no bainhira finaliza, Primeiru Ministru (PM) rasik mak atu lansa fatuk dahuluk ba projetu refere.
Nia deklara, projetu refere lao ona, tanba orienta husi Ministeriu Obras Publikas, iha neebe orientasaun nee projetu refere tenke atinji tiha 50% hafoin Governu fo kontratu.
“Agora nia progresu hira karik ema enjineiru mak bele koalia ida nee, maibe projetu nee loos hotu ona, tanba dokumentus submete hotu ona,” Adolfo argumentu.
Nia komenta, razaun Governu fo tarjetu projetu refere nia progresu fiziku tenke too 50% hafoin Governu fo kontratu, tanba projetu refere husi P62, nunee parte kompanhia servisu ona no submete ona dokumentu ba Ministeriu Obras Publikas atu haree no fo kontratu ba projetu refere.
Liga asuntu nee STL tenta komfirma Koordenador Tekniku Destakadu Obras Publikas Baucau liu husi telefone, maibe la atende.
Entretantu projetu refere ho tipu reabilitasaun mak hanesan estrada parte suvida cor ho sementi, estrada parte tetuk ateru ho ra, iha neebe kompleta valeta inklui monta manila no observasaun STL nian iha terrenu nota katak, parte kompanhia hada ona moru protesaun no valeta inklui halo alargamentu ba estrada refere.
(alb)
