BAUCAU, STLTIMORLESTE.com – Projetu reabilitasaun estrada rural iha Suku Sagadate, Postu Administrativu Laga, Munisipiu Baucau, pakote rua neebe responsabiliza husi kompanhia lokal Lamegua Star, seidauk iha progresu fiziku efetivu.
Xefe Suku Sagadate, Aureliano de Jesus aprezenta, husi tinan 2023 no 2024 Governu liu husi Ministeriu Obras Publikas (MOP) kontratu kompanhia lokal tolu sai responsabilidade ba implementasaun projetu reabilitasaun estrada rural hamutuk Kilometru (Km) 8 resin kobre ba Aldeia Aburi no Serebu’u ho durasaun servisu tuir tarjetu kontratu termina iha loron 31 Outubru 2025, ho tipu servisu estrada hanesan, ateru estrada, cor estrada tipu beton, konstrui ponte no valeta.
Kompanhia lokal tolu neebe MOP fo kontratu mak hanesan, Rozi Unipessoal Lda responsabilidade iha pakote dahuluk Km 2.15 ho valor orsamentu US$ 469,477.40. Kompanhia Sicola Unipessoal Lda responsabilidade iha pakote daruak Km 2.150 ho valor orsamentu US$ 448,715.07 enkuantu kompanhia Lamegua Star Unipessoal Lda responsabilidade ba pakote datolu no dahaat, maibe seidauk iha progresu fiziku implementa projetu iha terrenu.
“Estrada ba Serebu’u Abuti pakote primeiru nee Rozi kaer nee agora servisu lao hela maibe kleur ona. Pakote segundu Sicola kaer nee mos lao daudaun saluran hotu ona sira atu ateru ona. Pakote terseiru no kuartu Lamegua Star kaer nee, ate agora lori hela deit rai henek ba maibe seidauk servisu,” hateten Aureliano ba STL iha Sagadate, Laga, Segunda (17/08/2026).
Nia esplika, projetu reabilitasaun estrada Governu fo kontratu ba kompanhia lokal tolu refere implementa, atu responde ba preokupasaun komunidade uma kain 100 resin husi Aldeia rua refere iha Suku Sagadate, neebe durante tinan naruk infrenta problema estrada, tanba estrada refere antes nee kondisaun aat iha neebe tempu udan fo impaktu ba movimentasaun komunidade sira nian ho transporte publiku no privadu, liu liu komunidade sira bainhira infrenta moras emerjensia atu transporta ba fasilidade saude.
Maibe durante implementasaun projetu refere too ohin loron seidauk iha progresu fiziku neebe diak atu fasilita komunidade sira nia movimentasaun ho transporte publiku no privadu asesu merkadu, fasilidade saude no seluk tan, neebe komunidade husi Aldeia rua refere prezisa, tanba parte mota sira neebe kompanhia atu konstrui ponte seidauk finaliza no ateru estrada, cor no seluk tan, kuaze tinan naruk ona, maibe seidauk finaliza.
“Kompanhia sira nia servisu iha nee ami telefone nafatin Obras Publikas atu fo atensaun ba sira, maibe ida kompanhia Lamegua nee fulan neen resin ona laiha terrenu halo servisu. Lamegua nee aat liu, saluran ida halo nee mos baku fila hotu ona,” Aureliano komenta
Xefe Suku Sagadate nee husu Ministeriu Obras Publikas atu fo atensaun masimu ba kompanhia Lamegua Star, tanba prosesu implementasaun projetu refere iha terrenu lao la efetivu.
Iha fatin Koordendor Tekniku Destakadu Obras Publikas Munisipiu Baucau, Diego Cipriano Caleza hateten, projetu reabilitasaun estrada rural iha Suku Sagadate inklui iha Suku seluk, neebe kompanhia lokal sira implementa entre iha progressu diak no la diak, tekniku destakadu Munisipal relata ona ba Ministeriu.
“MOP odibainhira relata tiha ona Baucau nee hira sira palestra tiha ona iha Nasional. Se ami la haruka ba karik Ministru hatene husi neebe mak Baucau nee sekian. Neebe dadus sira husi ita nia parte nee ita haruka ona ba, atu oinsa nee desizaun Nasional nian,” hatete nia.
Nia informa, kompanhia Lamegua Unipessoal Lda neebe nia progresu servisu iha terrenu seidauk efetivu, relata hotu ona ba Ministeriu, maibe atu foti desizaun hasoru kompanhia refere iha Ministeriu nia liman.
Entretantu, too notisia nee publika STL seidauk hetan konfirmasaun ho parte kompanhia Lamegua Star, tanba la hetan rezidensia kompanhia nian iha Baucau.
(tom)
