DILI, STLTIMORLESTE.com – Projetu apoiadu Uniaun Europeia fó oportunidade ekonomia ba feto rural iha Covalima no Oecusse liuhusi agrikultura, poupansa no negósiu.
Projetu empoderamentu feto rural ne’ebé hetan apoiu husi Uniaun Europeia (UE) promove ona oportunidade ekonomia no inkluzaun sosial ba feto iha Munisípiu Covalima no Oecusse.
Diretór Interinu World Vision Timor-Leste (WVTL), Humbelino Pereira hatete katak, benefisiáriu sira hala’o atividade ekonomia iha komunidade, inklui empresta no rai osan, kuda modo, hakiak animal no produsaun tahu atu fa’an iha merkadu.
Atividade sira-ne’e ajuda feto sira hetan rendimentu atu sustenta nesesidade família nian, no iha grupu balun mós konsege aumenta oportunidade servisu ba membru komunidade seluk.
“Ita ensera no selebra susesu ne’ebé atinje durante tinan rua iha Munisípiu Covalima no RAEOA, liuhusi atividade empresta osan, kuda modo, hakiak animal no produsaun tahu,” dehan Pereira ba jornalista sira depois enserra projetu iha Hotel Timor, Kolmera, Dili, Kinta (27/08/2026).
Nia hatete, atividade poupansa no empresta osan liuhusi grupu kooperativa ajuda família sira jere osan no aumenta kapasidade ekonomia.
Maibé, WVTL hasoru dezafiu iha implementasaun projetu, liuliu atu muda mentalidade komunidade iha tempu badak.
Pereira hatete, projetu ne’e envolve benefisiáriu hamutuk 9.000, maski rezultadu grupu sira la hanesan. Iha grupu balun konsege hetan susesu, maibé iha mós grupu balun ne’ebé seidauk atinje rezultadu esperadu.
“Komunidade iha área rural balun menus informasaun no sei depende barak ba apoiu WVTL no FOKUPERS. Ami ho parseiru sira konsege atinje metas balun, maibé labele responde nesesidade hotu,” nia afirma.
Embaixadór Uniaun Europeia iha Timor-Leste, Thorsten Bargfrede hatete, UE kontinua apoia programa empoderamentu feto rural, inklui liuhusi finansiamentu ba WVTL no parseiru FOKUPERS.
Nia afirma, apoiu ne’e ho objetivu atu mobiliza komunidade, hasa’e kapasidade feto no ajuda família sira dezenvolve atividade negósiu, agrikultura, poupansa no empresta osan.
“Liuhusi parseiru sira, ami mobiliza komunidade atu hasa’e empoderamentu feto no ajuda sira halo atividade negósiu oioin, hetan osan atu sustenta família no kria servisu ba ema seluk,” dehan Bargfrede.
Nia konsidera, ligasaun entre atividade agrikultura, poupansa no empresta osan hatudu progresu pozitivu iha komunidade benefisiáriu.
UE aloka US$ 2,5 miliaun ba WVTL atu fasilita grupu benefisiáriu no apoia komunidade rural hodi hasa’e sira nia kapasidade ekonomia.
(dom)
