DILI, STLTIMORLESTE.com – Ministeriu Publiku (MP) lakon nia figura diak ida, Prokuradora Ivonia Maria de Jesus da Costa Guterres, neebe durante nee halao knaar iha MP.
“Ho laran susar no sentimentu neebe klean, hau hatoo liafuan hirak nee iha momentu ida neebe nakonu ho tristeza no despedida,” dehan Prokurador Jeral da Republika, Nelson de Carvalho iha nia intervensaun, wainhira presta omenajen ikus ba maktoba iha Edefisiu PJR, Segunda (17/08/2026).
Nia hatutan, familia boot Ministeriu Publiku Timor Leste nian iha lutu, lakon ema ida neebe ita hotu hadomi, majistrada ida neebe dedika parte boot husi nia moris ba Ministeriu Publiku no Justisa, no durante liu tinan rua nulu servi instituisaun ida nee ho dignidade, dedikasaun no sentimentu boot konaba nia dever.
PJR dehan, Dra. Ivonia Maria de Jesus da Costa Guterres, fizikamente agora la iha ona iha ita nia leet, maibe nia sei nafatin hela iha istoria instituisaun ida nee no iha moris ema hotu neebe iha privilejiu servisu no moris hamutuk ho nia. Iha momentu ida nee, difisil tebes atu hetan liafuan loos hodi koalia konaba ema ida neebe besik tebes ba ita, no nia partida husik mamuk ida neebe klean tebes iha ita-nia laran.
“Hau lakohi repete iha nee, perkursu profisionál Dra. Ivónia Maria de Jesus da Costa Guterres nian, tanba ema sira neebe koalia ona molok hau, halo rekordasaun no hatoo ho loloos. Maibe hakarak sublina aspetu ida neebe importante tebes iha nia moris. Dra. Ivónia sai parte husi istoria Ministériu Públiku Timor Leste nian husi inisiu kedas,” dehan PJR.
PJR dehan, maktoban halao knaar nuudar Majistrada Judisiál ka Juiz iha Tribunál Distritu Baucau durante periodu tranzisaun UNTAET, entre tinan 2000 no 2005. Hafoin nee, nia tama iha karreira majistratura Ministériu Públiku nian no nafatin servisu ba instituisaun ida nee too iha loron ikus nia hakotu iis. Nunee nia mos ida husi majistrada sira neebe akompanha no ajuda harii Ministériu Públiku Timor Leste nian, husi tinan sira uluk kedas iha ita nia dalan atu harii no hametin instituisaun ida nee.
Nia splika, durante tinan rua nulu liu, nia uza beka Ministériu Públiku nian ho dignidade no orgulhu, no kompriende diak responsabilidade boot neebe vestimenta ida nee reprezenta iha sosiedade, Justisa no Estadu de Direitu nia oin.
Konsidera, Dra. Ivónia Maria de Jesus da Costa Guterres laos deit destaka aan liu husi nia profisionalizmu, kompetensia no sentimentu responsabilidade, maibe mos liu.husi maneira nia relasaun ho ema sira neebe haleu nia. Ema hotu neebe iha oportunidade atu konvive ho nia sei hanoin nafatin nia hamnasa, nia laran diak, nia maneira simpatika no nia atitude karinozu sira. Nia trata ema sira seluk ho respeitu, koreksaun no urbanidade, la haree ba pozisaun ka funsaun neebe sira okupa.
Afirma tan, kualidade umana sira nee mak dala barak la rejista iha dokumentu sira konaba karreira ida, maibe nafatin metin iha memoria ema sira neebe fahe parte ida husi moris ho ita. Tanba nee, legadu neebe Dra. Ivónia Maria de Jesus da Costa Guterres husik mai ita, liu fali nia karreira profisional.
Nia husik mai ita ezemplu ida husi majistrada neebe halao nia knaar ho dignidade, lealdade no umanidade. Maibe ohin, koalia liu kona-ba majistrada, ita hakarak hanoin no rekorda ema. Ita hakarak hanoin kolega, amiga, kompanera iha jornada profisional naruk, no prezensa amiga ida neebe liu husi nia hamnasa, nia maneira atu moris no nia maneira trata ema, marka iha moris ba ema barak neebe iha oportunidade atu hatene no konvive ho nia. Nia partida husik mamuk boot ida iha nia familia, iha nia belun sira, iha nia kolega sira no iha familia tomak Ministériu Públiku nian.
PJR profunda, ho tristeza ida nee, nafatin iha mos sentimentu ida neebe importante, gratidaun ba tempu neebe ita fahe hamutuk ho nia, ba servisu neebe nia halao ba kontribuisaun neebe nia fo ba konstrusaun Ministériu Publiku Timor Leste nian, no liu-liu ba privilejiu neebe ita hetan tanba bele hatene nia no iha nia sorin.
“Ba familia enlutada, lori naran Prokuradoria Jerál Repúblika no familia tomak Ministériu Publiku nian, hatoo ami nia solidariedade no kondolensia klean liu, ami fahe hamutuk ho ita boot sira nia tristeza iha momentu ida nee,” dehan PJR.
Akresenta, hatene katak liafuan ida deit labele priense mamuk neebe nia partida. Maibe, hakarak ita boot sira hatene katak, iha momentu tristeza ida nee, ita boot sira la mesak, hamutuk ho imi no fahe lakon ida nee, ho respeitu, amizade no sentimentu klean.
Dra. Ivónia Maria de Jesus da Costa Guterres husik mai ita, moris ida neebe dedikadu ba servisu no ezemplu ida kona-ba umanidade, neebe sei nafatin akompanha ema sira neebe servisu no moris hamutuk ho nia.
Katak nia ezemplu konaba dedikasaun, dignidade no umanidade kontinua fo inspirasaun ba ema hotu neebe sai parte husi Ministériu Públiku. No nia naran sei nafatin liga ho istoria Ministériu Públiku Timor.Leste nian, instituisaun ida neebe nia dedika nia aan tomak..
PJR dehan, iha momentu despedida ida nee, ita hakruuk iha oin, nia memoria no hatoo ba nia ita nia omenajen ikus. Ministériu Públiku husu Aman Maromak atu simu nia klamar iha Nia gloria eterna no fo forsa, konsolasaun no serenidade ba nia familia no belun sira, atu sira bele hasoru lakon irreparavel ida nee.
Dra. Ivónia nia naran no nia memoria nafatin hela iha familia boot Ministériu Públiku, hatoo obrigadu barak ba ninia servisu, ba ninia dedikasaun no ba amizade neebe nia fahe hamutuk ho ita boot sira.
Iha sorin seluk, Defensor Publiku Sergio Dias Quintas konesementu Prokuradora Ivonia hanesan Majistrada iha tempu UNTAET.
“Hau konhese kleur ona Doutora Ivonia Maria Guterres iha altura kuandu nia nudar Mazistrada iha tempu UNTAET, feto ida neebe iha integridade no potensial hodi halo knar nudar Mazistrada Ministeriu Publiku iha tempu naruk,” dehan Defensor Publiku Sergio Dias Quintas.
Sergio konta, wainhira Prokuradora moras, Prokuradora sei iha korazen no pasiensia hodi tuir julgamentu iha Tribunal, mesmu dala ruma Prokuradora nia saude la permite.
Sergio profunda, nuudár Majistrada Ministeriu Publiku, Doutora Ivonia dala barak defende feto maluk sira no labarik sira nia direitu iha Tribunal.
Sergio dehan, Doutora Ivonia nia mate husik hela memoria ida importante ba setor justisa liu-liu Ministeriu Publiku neebe lakon figura ida importante iha knaar Ministeriu Publiku nian.
Tuir observasaun STL nian, maktoba too iha edefisiu MP Kolmera, simu husi Majistradu Ministeriu Publiku. No presta omenajen iha vizita Edefisiu MP nee, Prokurador Jeral Republika ho nia membru sira, Ministru Justisa, Vise Ministru Justisa, Prezidente Tribunal Rekursu, Defensor Publiku Jeral, Koordenadora Reforma Setor Justisa, Majistradu Juiz Defensor Publiku no Advogadu Privadu, Direktor PSIK no funsionariu MP nian.
(ter)
