DILI, STLTIMORLESTE.com – Tinan ba tinan Governu promete atu hasa’e saláriu minimu, maibé realidade hatudu promesa sira ne’e mamuk de’it. Traballadór kiik sira iha Dili kontinua halerik no hein to’o kolen tanba ho saláriu US$ 115 labele sustenta moris, enkuantu kustu moris sa’e maka’as, maibé Governu nonok hela hanesan taka matan ba terus ne’ebé sira hasoru loron-loron.
Halerik ne’e hato’o husi Jose de Oliveira, ne’ebé servisu iha loja eletróniku ida iha Dili. Nia konsidera Governu seidauk hatudu seriedade atu hasa’e saláriu minimu tuir kustu moris ohin loron nian.
Jose de Oliveira hateten, maske folin sasan iha merkadu sa’e maka’as no nesesidade moris loron-loron todan, maibé to’o agora saláriu ne’ebé nia simu sei la sufisiente atu sustenta família.
“Ami traballadór kiik ne’e servisu oras naruk, maibé saláriu kiik nafatin. Ami rona de’it Governu nia promesa mamuk atu hasa’e saláriu minimu, maibé to’o agora ami hein to’o kolen seidauk iha desizaun klaru,” Jose dehan ba jornalista sira iha Dili, Segunda (21/09/2026).
Nia hatutan, ho saláriu minimu US$115 ne’ebé vigor hela, susar tebes atu selu uma aluga, sosa hahán no selu oan sira-nia eskola, tanba kustu moris iha Dili sa’e maka’as.
Jose husu ba Governu liu husi Sekretaria Estadu Formasaun Profisionál no Empregu (SEFOPE) atu labele demora tan prosesu diskusaun kona-ba hasa’e saláriu minimu ne’e.
“Ami la husu barak, ami husu de’it saláriu ne’ebé justu no dignu. Se Governu hakarak hasa’e, tenke hasa’e duni, la’os ko’alia de’it,” nia hateten.
Alende nee nia mós husu ba patraun sira atu iha konsiénsia no respeita direitu traballadór sira, tanba balun seidauk selu tuir saláriu minimu ne’ebé estabelese ona.
Iha parte seluk Observadór Ekonomia, Manuel de Araujo hateten katak Governu presiza halo estudu kle’an molok hasa’e saláriu minimu, tanba presiza haree mós kapasidade setór privadu atu selu.
“Governu hasa’e saláriu minimu sein analiza didi’ak, setór privadu kiik sira bele taka no ikus mai traballadór sira mak lakon servisu, la’os hetan benefisiu,”hatete Manuel.
Observadór Ekonomia ne’e hatutan, solusaun di’ak mak Governu hasa’e etapa por etapa, hahú husi US$115 ba US$150, no kontinua halo diálogu ho emprezáriu sira atu labele prejudika klima investimentu iha rai laran.
Entretantu, Akademista UNTL, Romaldo da Costa hateten katak hasa’e saláriu minimu ne’e nesesidade urjente no justu, tanba traballadór kiik sira mak kontribui maka’as ba ekonomia.
“Governu kontinua nonook no la hasa’e saláriu minimu, dezigualdade sosiál sei aumenta no traballadór sira sei kontinua moris iha kiak nia laran,”dehan nia.
To’o notísia ne’e STL hatun, SEFOPE seidauk fó sai deklarasaun ofisiál kona-ba data serteza atu hasa’e saláriu minimu ba traballadór sira.
(car)
