DILI, STLTIMORLESTE.com – Durante nee publiku balu kestiona konaba blanku ba iha Bilhete Indentidade (BI), tanba nee Ministru Justisa deklara katak, sei buka solusaun.
Ministru Justisa, Sergio Hornai dehan, MJ nunka hakarak rai aprovizionamentu nia orsamentu nee iha MJ nia meza kleur, para mais ida nee aprovizionamentu para halo atendimentu ba ita nia sidadaun sira.
“Hau buka esforsu parake ohin hau labele asina, entaun sira lori ba uma para hau tenke haree hodi bele halo despaixu, atu nunee bele halo prosesu administrativu ba aprovizionamentu no lalais para atu bele hetan kompanhia sai hanesan vensedor, konforme ita nia rejime juridiku aprovizionamentu ninian para atu bele garante funsionamentu normal ba ita nia blanku sira atendimentu publiku sira,” dehan Ministru Justisa, Sergio Hornai ba jornalista sira iha iha Kolmera, Tersa (16/06/2026).
Tuir MJ, nuudar membru Governu labele garante katak, prosesu aprovizionamentu ba konkursu ba blanku BI finaliza iha fulan nee nia laran, tanba depende ba prosesu aprovizionamentu.
Hornai esplika, hanesan Governante tenke hateten katak Governu se deit hola desizaun ba interese povu nian, labele halo pelu kontrariu.
Iha fatin ketak, Komunidade Etelvina Dos Santos dehan, sira ba trata ona BI, maibe sira sei simu surat tahan mutin deit.
“Ami ba trata ona BI maibe ami sei simu surat tahan mutin deit, ida nee mos sai kestaun ida se ita la rai didiak, kona be ho udan bele estragus,” dehan nia.
Nia hatutan, husu atu parte relevante bele buka solusaun, tanba ohin loron Timor oan barak maka trata sira nia dokumentus, balu ba Australia, Corea no mos fatin seluk. Tanba nee tenke buka solusaun lalais ba iha kestaun sira nee.
Nia esplika, espera bele iha solusaun lalais, atu sira neebe ho kertas mutin bele ba troka ho orijinal. Reforsa tenke hare mos kestaun nee, tuir lo-loos haree estok hotu ona tenke prepara planu antes, atu nunee labele hanosu preokupasaun iha publiku kona-ba blanko ba BI.
(ter)
