DILI, STLTIMORLESTE.com – Oras nee daudaun prosesu ba konsesaun eskolar lao hela, hafoin remata prosesu nee bele atribui konsesaun ba eskola.
Informasaun nee hatoo husi Direitor Nasional Ensinu Sekundariu iha ME, Benjamin Gomes da Cruz Fernandes ba STL iha ME, Kuarta nee (18/03/2026).
“Kona-ba tinan nee eskola nobel atu hetan konsesaun, hau hanoin ida nee hau rasik seidauk hetan informasaun, tanba nee ba asuntu ida nee hau seidauk hetan informasaun, agora konsesaun eskolar ba ita nian nibel ensinu sekundariu ninia, agora daudaun ninia prosesu nee sei lao hela, bainhira remata mak ita bele atribui konsesaun ba ita nian eskola Sira,” nia deklara.
Iha fatin seluk, Diretor Eskola Sekundariu Nobel da Paz, Jeremias P. de Jesus hatete, durante tinan hira nian laran, sira la hetan konsesaun eskolar husi ME, maibe tinan ida nee foin daudaun hasoru ona SEM Dili hodi koalia ba asuntu ida nee, espera ba tinan ida nee sira bele hetan ona.
“Hau sente durante tinan hira nian laran, ami la hetan konsesaun eskolar husi ME, maibe tinan ida nee foin daudaun hasoru ona SEM Dili hodi koalia ba asuntu ida nee, espera ba tinan ida nee sira bele hetan osan ida nee,” dehan nia.
Jeremias akresenta, konsesaun eskolar ba eskola pribadu nee kada estudante US$ 1, no ba eskola públiku mak kada estudante US$ 2, nee duni sira sei hatama pedidu ba iha Edukasaun Munisipiu Dili.
Entretantu Diretor Eskola Sekundariu 10 Dezembru Komoro, Manuel Verdial hatete, kona-ba konsesaun eskolar sira seidauk simu, maibe husi parte eskola nian hein deit, bainhira mak ME atribui konsesaun ba eskola sira.
(jac)
