DILI, STLTIMORLESTE.com – Pesoal Saude (PS) mediku, enfermeiru no parteira husi Servisu Emerjensia Medika Munisipiu (SEMM) Dili, Atauro, Ermera, Liquiça, Bobonaro, Manatuto, Baucau, Viqueque no Lautem tuir formasaun utiilizasaun ekipamentu medikus neebe realiza husi Servisu Nasional ba Ambulansia no Emerjensia Medika (SNAEM), liu husi Diresaun Nasional Operasaun (DNO).
Liu husi pajina SNAEM neebe STL sita katak, treinamentu nee halao iha Sesta (22/05/2026).
Iha biban nee Diretora Nasional Operasaun (DNO), Custodia Benevides Florindo hateten, atividade ida nee hanesan prioridade importante ida atu implementa regularmente iha servisu operasional ambulansia SNAEM, I.P. Oinsa ekipa atu presta nia servisu iha tereno mak tenke iha koñesementu neebe diak ba utilizasaun ekipamentus mediku.
“Iha inisiu 2026 ita distribui ona ekipamentus mediku ba iha SEMM Munisipiu sira, ho-nunee objetivu husi treinamentu ida nee oinsa ekipa sira bele konese liu tan modelu/ spesifikasaun foun husi ekipamentus sira iha SNAEM, I.P. Importante mos prediza defini spasu/ fatin neebe adekuadu hodi asegura ekipamentus sira nunee sustentabilidade nia utilizasaun ba tempu naruk,” dehan nia.
Nunee mos Diretora Jeral Interina Servisu Nasional ba Ambulansia no Emerjensia Medika (SNAEM,I.P), Sezaltina Araújo Mendonca iha abertura akresenta, agradese ba Diresaun Nasional Operasaun ba Departamentu Servisu Ambulansia neebe mak realiza ona treinamentu konaba utilizasaun ekipamentus medikus.
“Ekipamentus medikus neebe mak DNO fahe ona ba SEMM sira nee kompras ho OJE SNAEM,I.P 2025, no tinan nee mos ita sei kompras nafatin hodi responde ba preokupasaun SEMM sira nia, meius ida hodi bele responde ba situsaun iha terenu, husu atu kuidadu didiak, tanba ajuda tebes iha servisu loron loron nia,” dehan nia.
Diretora nee mos salienta, utilizasaun ekipamentus medikus neebe mak durante nee seidauk masimu, hatene hela maibe haluha oinsa atu uza neebe refreshing training nee importante tebes. Husu mos ba partispantes sira hotu tuir treinamentu ho masimu aproveita no bele gainha esperensia no konhesementu neebe mak diak konaba ekipamentu sira.
Treinamentu ba etapa dahuluk nee fasilita Xefe Departementu Servisu Ambulansia, Raimundo Pinheiro Magno no Responsavel Ekipamentus Mediku, Januario de Carvalho. Aktividade ida nee hetan apresiasaun no partisipasaun masimu husi reprezentante Departamentu SEMM sira.
(dom)
