DILI, STLTIMORLESTE.com – Polisia Sientifiku no Investigasaun Kriminal (PSIK) iha Kuarta (29/04/2026), maizumenus tuku 09:00 OTL dader, halo buska no apreensaun iha edifisiu empreza estatal TIMOR GAP ba nia Dirijente ho inisial AC iha CBD 01 Timor Plaza.
Iha buska no apreensaun neebe halao durante oras tolu nia laran nee, tuir informasaun katak, PSIK halo ezaminasaun ba objetu importante balun, hanesan komputador, laptop, telemovel, USB, no dokumentu importante sira balu tan.
Enkuantu jornalista sira husi media oin-oin hein iha resepsionista atu foti imajen ba atividade buaska no apreensaun nee, maibe Prezidente TIMOR GAP, Rui Maria Alves Soares la autoriza atu jornalista sira asesu tama too iha edifisiu TIMOR GAP nian.
“Se mak konvida imi (jornalista-red) mai, imi sai husi nee, hodi fo espasu ba ami atu halao servisu,” Rui Maria Alves Soares hateten hodi taka odamatan ba jornalista sira.
Tuir informasaun katak, atuasaun buska no apreensaun nee kontinuasaun husi buska neebe Komisaun Anti Korrupsaun (KAK) halo tiha ona iha loron 17 Dezembru 2025 ba dirijente ho insial AC nee nia rezidensia privadu iha Aldeia 03, Suku Komoro, Postu Administrativu Dom Aleixo, Munisipiu Díli.
Deskonfia dirijente TIMOR GAP ho inisial AC nee iha relasaun ho kazu projetu irrigasaun iha Munisípiu Aileu no mega projetu balun iha Suai, neebe tuir relatoriu KAK nian katak kazu hirak nee iha ona prosesu investigasaun neebe atinji ona 60%.
Informasaun neebe STL hetan KAK katak, kazu projetu irrgasaun Aileu nee iha ligasaun ho maun alin rasik ho suspeitu inisial AC neebe nuudar Dirijente TIMOR GAP ho kompanhia kontaktor ida inisial L.
(jen)
