DILI, STLTIMORLESTE.com – Prezidente Federasaun Futeból Timor-Leste (FFTL), Nilton Telmo Gusmão informa katak públiku tomak iha Timor Leste bele asiste jogu Kopa Mundial 2026 iha Radio Televizaun Timor Leste (RTTTL) liu hosi antena UHF/VHF no asiste Kopa Mundiál 2026 ho espíritu desportivu no labele hamosu dezentendimentu sira neebé kria instabilidade tanba futeból nia alvu mak halo ema iha unidade no hamutuk iha vizaun ida ba paz iha mundu.
Prezidete FFTL, Nilton Gusmao hato’o lia hirak nee liuhosi konferensia imprensa neebe halao iha Hotel Timor, Dili, Sesta (5/6/2026).
Nia dehan, povu Timoroan hotu bele asiste direita Kopa Mundial 2026 liu husi kanal TV RTTL neebe Deborla no Kanal NTV, so kanal liu husi assinatura mak liu husi ETO Telco no mos Timor Telecom, hanesan RTTL.EP Kanál nakloke ho gratuita ba munisípiu hotu bele asesu uza antena UHF/VHF, tanba nee mak kanál ofisiál ba munisípiu tomak.
Nilton Gusmao dehan ba ba sira neebe iha kbiit atu asesu ba iha Kopa Mundial 2026 nee, sei liu husi ETO Telco, tanba liu husi assinatura, no mos Timor Telecom neebe prepara live streaming husi aplikasaun neebe sira prepara. Maibe iha kanal neebe nakloke ba munisipiu hotu mak liu husi RTTL.ep.
Nilton Telmo Gusmão dos Santos mos husu Timoroan hotu asiste Kopa Mundiál 2026 ho espíritu desportivu no labele hamosu dezintendimentu sira neebé kria instabilidade tanba futeból nia alvu mak halo ema iha unidade no hamutuk iha vizaun ida ba paz iha mundu.
Iha konferensia imprensa, Nilton Gusmao neebe akompania husi Sekretariu Estadu Komunikasaun Sosial (SEKOMS) Expedito Dias Ximenes no Jerente ETO TELCO, Edmundo Freitas Lopes, sente haksolok no orgullu, lori FFTL no mós FIFA nian naran hakarak hato’o ba Timoroan hotu katak festa Kopa Mundiál 2026 neebe hahu iha 11 Junhu 2026 iha nasaun tolu mak hanesan, Mexiko, Estadus Unidus Amérika (EUA) no mós Kanada.
Tanba nee, ho previleziu, Timor-Leste hetan oportunidade, Timoroan hotu hetan oportunidade, atu asiste jogu Kopa Mundiál 2026 nian iha kanál tolu kompostu husi Radiú Televizaun Timor-Leste/empreza públika (RTTL, E.P), NTV no mós iha live streaming nian ho Timor Telecom (TT).
“Lori lori FFTL nian naran hau hakarak kongratula empreza sira neebé ho sira nia disponibilidade ho sira nia kbiit rasik no mós instituisaun média estatál RTTL,E.P neebé kontinua hakarak oferese servisu ba povu hodi loke kanál ba sosiedade hodi bele asiste jogu ka estaklu boot mundu nian neebé ema koñese Kopa mundiál 2026,” katak Nilton.
Nia haktuir tan katak iha tinan barak atividade sira nee sempre fó sai direitu tanba hatene katak sosiédade Timor-Leste iha paixaun hadomi tebes futeból.
Dala ida tán, Niton Gusmão husu ba foin-sae atleta sira ka jogadórsira, ema hotu neebé hadomi futeból atu akompaña festa ida-nee ho diak ho esperitu desportivu para bele foti referénsia diak hodi bele hadia mós ita nia futeból rai laran atu transforma futeból nuudár orgullu nasionál.
Nia mos dehan, nuudár Prezidente FFTL no nuudar membru ba Komité Anti Rasizmu no Diskriminasaun FIFA hetan konvite atu partisipa iha abertura Kopa Mundiál 2026 iha Mexiko.
“Hau sei ba loron 09 fulan-Juñu 2026 sai husi iha nee ba asiste abertura kopa mundiál 2026 hanesan membru FIFA, iha departamentu Anti Rasizmu no Anti Disikriminasaun sei hamutuk ho membru FIFA selu-seluk no membru asosiasaun sira seluk iha neebá hodi asiste serimonia abertura to’o iha serimonia finál kopa mundiál 2026,” dehan Nilton Gusmao.
Kopa Mundiál FIFA 2026 neebe sei halao iha Estadus Unidus Amérika, Kanadá no Méxiku neebe sei hahu iha 11 Junhu 2026 sai hanesan edisaun dahuluk ho ekipa partisipante hamutuk 48.
Entretantu, Sekretariu Estadu Komunikasaun Sosial (SEKOMS) Expedito Dias Ximenes lori IX Governu Konstitusional nia naran hatoo agradese ba empreza tolu hanesan Radiú Televizaun Timor-Leste/empreza públika (RTTL, E.P), NTV no mós iha live streaming nian ho Timor Telecom (TT) fo sai jogu Tasa Mundial 2026.
Tuir Observasaun STL TV iha terenu hatudu katak komunidade sira faan bandeira nasaun sira neebe nia jogador sira joga iha Kopa Mundial 2026 iha dalan protokolu kapital Dili.
(mik/alb)
