DILI, STLTIMORLESTE.com – Autoridade RAEOA esforsu rezolve divida não-finanseira pendente, atu labele lori problema osan ba tinan 2027 no fó prioridade ba programa dezenvolvimentu foun.
Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu, hatete katak, atualmente iha divida não-finanseira entre kazu haat to’o lima, ne’ebé mosu husi projetu no despeza administrasaun anterior ne’ebé seidauk iha kabimentu orsamentál.
Regio hato’o informasaun ne’e ba STL iha Salaun Auditorium Ministeriu Finansas Aitarak, Dili, Tersa-feira (25/08/2026). Nia hatete katak, prosesu rezolve divida sira ne’e lao hela ho koordenasaun entre RAEOA no Ministériu Finansas.
“Dividas sira ne’e tenke selu, tanba ida ne’e divida Estadu nian. Agora ita iha faze final atu bele selu, maibé balun selu tiha ona,” dehan Regio.
Nia esplika katak, pagamentu ba divida não-finanseira presiza kompleta dokumentus no prova sira, inklui lista prezensa, fotografia, justifikasaun despeza no dokumentasaun aprovizionamentu, atu Ministériu Finansas bele verifika no aprova pagamentu.
Regio admite katak, balun husi divida sira ne’e mosu iha tempu finál tinan anterior, bainhira pedidu despeza halo tarde no la iha kabimentu orsamentál. Situasaun ne’e, tuir nia, sai hanesan lisaun ba Autoridade atu hadia sistema administrasaun no aprovizionamentu.
Nia asegura katak, Autoridade RAEOA sei evita atu problema hanesan ne’e repete iha futuru, liuhusi kumprimentu prosedimentu governu no regra Ministériu Finansas.
“Ha’u hanesan Prezidente Autoridade RAEOA, husu deskulpa. Iha ami nia tempu, ami hakarak haree katak buat ne’e labele repete. Ami sei lao tuir prosedimentu,” afirma Regio.
Ezekusaun OJE atinji 30% resin
Iha parte seluk, Regio hatete katak, ezekusaun Orsamentu Jeral Estadu (OJE) 2026 iha RAEOA to’o fulan Agostu atinji ona 30% resin, husi total despeza US$ 60 miliaun, ne’ebé kompostu husi reseita RAEOA US$ 30 miliaun no transferénsia administrasaun US$ 30 miliaun.
Nia projeta katak, ezekusaun OJE bele atinji 50% to’o fulan Outubru no 80% bainhira tinan 2026 remata.
Regio hatete katak, prosesu pagamentu agora lao diak liu tanba sistema no prosedimentu administrativu sira kontinua hadi’a.
Antes ne’e, Sekretáriu Rejionál Administrasaun no Finansas RAEOA, Salvador da Cruz, hatete katak pagamentu ba projetu sira iha Oecusse atrasadu tanba dokumentus sira presiza verifika uluk husi área aprovizionamentu no finansas.
Nia hatete katak, estrutura Autoridade RAEOA agora permanente no lidera husi Regio da Cruz Salu, ne’ebé esforsu atu rezolve divida no hadi’a administrasaun no jestaun finanseira.
Salvador mos hatete katak, ezekusaun OJE 2026 iha RAEOA hafoin tomada pose autoridade foun, kuaze fulan ida ho balun, komesa lao diak no iha semana kotuk atinji 34% husi Fundo Konsolidado RAEOA no Fundus Espesiál Dezenvolvimentu (FED).
Tuir nia, tenderizasaun ba projetu sira mos komesa anunsia, no prosesu sei kontinua tuir meta no orientasaun Ministériu Finansas.
Iha parte seluk, komunidade husu Autoridade RAEOA atu asegura ezekusaun orsamentu ho transparénsia no la haree deit ba persentajen ezekusaun, maibé mos ba impaktu direto ba moris povu.
“Povu kiik la ezije osan, maibé pelumenus hadia estrada sira iha área rurál, atu fasilita movimentu transporte públiku no lori produtu ba merkadu,” dehan Maria Elu.
Ministru Obras Públikas, Samuel Marçal, rekonhese katak ezekusaun OJE iha RAEOA atrasadu uitoan tanba mudansa estrutura husi sistema tranzitóriu ba estrutura permanente.
Nia husu ba Oecusse-oan sira ne’ebé sai lider iha sira-nia rai rasik atu servisu hamutuk hodi lori dezenvolvimentu Oecusse ba oin.
(joa)
