DÍLI, STLTIMORLESTE.com — Rejiaun Administrativa Espesial Oecusse-Ambeno (RAEOA) tama ona iha faze konsolidasaun iha Outubru 2026, husu lideransa servisu hamutuk no responsabilidade.
Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu hato’o pozisaun ne’e iha serimonia isar bandeira nasional iha Kampu Futebol Oebau, Segunda-feira (05/10/2026).
Regio hadteten katak, depois liu hosi faze estabelesimentu, Autoridade agora tama iha faze konsolidasaun atu avalia rezultadu, identifika limitasaun no hadi’a dezempenhu.
“Agora ita tama iha faze konsolidasaun,” dehan Regio, hodi husu instituisaun atu hatudu rezultadu konkretu ba povu.
Nia mós husu diretores, funsionáriu no entidade sira hotu atu hametin kooperasaun, aumenta responsabilidade no responde ba nesesidade komunidade.
Website sai janela informasaun
Regio hato’o preocupasaun kona-ba presensa dijital Autoridade, liuliu website ne’ebé tenke fasilita asesu públiku ba informasaun.
Nia hateten, website tenke sai instrumentu ba públiku, parseiru no visitantes atu asesu programa, atividade no rezultadu servisu Autoridade.
Regio lembra katak iha 2025, Autoridade aloka ona osan atu apoia kriasaun website. Tanba ne’e, website tenke kontinua dezenvolve no atualiza.
Kada diresaun no seksaun, tuir nia, tenke kontribui atu atualiza informasaun kona-ba atividade no servisu ne’ebé hala’o.
Kritika sai oportunidade aprende
Regio mós husu lideransa no funsionáriu sira atu la haree kritika husi media no sosiedade hanesan ameasa.
Nia konsidera kritika hanesan oportunidade atu aprende, hadi’a servisu no aproxima instituisaun liután ho komunidade.
“Ha’u gosta media kritika,” afirma Regio, hodi subliña katak kritika konstrutiva bele ajuda instituisaun hadi’a fraqueza.
Tuir nia, media no sosiedade iha papel importante atu acompanha servisu governasaun no instituisaun públika.
Nia husu Autoridade atu hametin unidade interna, respeitu malu no abertura ba opiniaun husi li’ur.
Preparasaun Komemorasaun 28 Novembru
Prezidente Autoridade RAEOA mós prepara ona Komemorasaun Proklamasaun Unilateral 28 Novembru 2026, ho komisaun organizadora estabelese ona.
Regio husu komisaun atu kontinua prepara planu, atividade no proposta, inklui dokumentus soft copy no hard copy.
Nia husu diretores no membru komisaun atu servisu hamutuk no halo koordinasaun atu garante preparasaun eventu nasional ne’e la’o diak.
Monitoriza obra infraestrutura
Infraestrutura mós sai prioridade iha akompañamentu servisu Autoridade, liuliu projetu sira ne’ebé diretamente afeta komunidade.
Regio husu diretores no responsavel sira atu halo monitorizasaun ba obra no projetu infraestrutura to’o remata.
Ba nia, osan públiku tenke uza ho responsabilidade, no projetu planeadu presiza akompañamentu rigorozu.
Nia subliña instituisaun públika tenke sai ponte entre Estadu no povu, hodi fasilita komunidade asesu ba servisu no dezenvolvimentu.
Relatóriu avalia dezempenhu
Regio husu diresaun no seksaun sira atu prepara relatóriu rezultadu servisu to’o Setembru 2026, nu’udar baze avaliasaun.
Relatóriu ne’e sei hatudu progresu, atividade, rezultadu no dezafiu iha kada unidade durante períodu avaliasaun.
Nia husu responsavel sira atu prepara relatóriu tuir formatu determina, hodi aprezenta ba entidade tutelar.
Hametin unidade no disciplina
Iha parte ikus, Regio husu funsionáriu sira hotu atu respeita oras servisu, hametin disciplina no aumenta responsabilidade profissional.
Nia subliña, kooperasaun entre diretores, sekretáriu rejionál, PA-RAEOA no funsionáriu hotu importante ba instituisaun nia dezenvolvimentu.
Ba nia, instituisaun forte la depende deit ba lider ida, maibé depende ba capacidade ema hotu atu servisu hamutuk.
Regio mós husu kontinua treinamentu kona-ba prinsípiu no Lei Funsaun Públika, hodi funsionáriu kompriende sira nia direitu no dever.
Nia hateten, funsionáriu públiku tenke iha kapasidade, étika no responsabilidade atu fó servisu diak ba Estadu no povu.
Iha mensajen ikus, Regio husu atu uza kritika hanesan espellu hodi identifika sala, aprende no hadi’a servisu.
Tuir nia, RAEOA iha papel importante nu’udar ponte entre Estadu no povu Oecusse, no ponte ne’e tenke forte atu lori dezenvolvimentu.
(jos)
