DILI, STLTIMORLESTE.com – Insidente rai lakan neebe akontese iha loron 19 Abril 2025, tuku 17:00 OTL, hafoin akontese udan boot no rai lakan kona sidadaun nian tolu (3), ida lakon vida no nain rua baixa kedas iha Hospital Referal Munisípiu Likisa.
“Kazu insidente nee akontese iha Sesta feira santa, bainhira udan boot iha foho Munisipiu Likisa, derepente rai lakan kona ami nia alin tolu kompostu husi feto nain rua mane ida,” hatete familia Jezito dos Santos ba STL liu husi telefone, Segunda (21/04/2025).
Nia dehan, iha feto ida ho naran Jelita dos Santos, Idade 29 neebe lakon vida, hetan fatin Armola, Dato, Munisipiu Likisa no Elizete da Conceição ho Idade 25 hela fatin area Armola, Aldeia Pukelara, Suku Dato, Postu Administrativu Likisa, Muninisípiu Likisa nomos Luizinho Ricardo Lopes no Idade 25 hela fatin Armola Orijem Asorlema, Suku Mategou, Postu Administrativu Bazartete, Munisípiu Likisa, no agora daudaun hetan tratamentu saude intensivu iha Hospital Munisipiu Likisa.
Iha fatin ketak, Vitima Luzinho neebe baixa iha Hospital Referal Likisa informa, rona mota boot tun iha area Armola, entaun sira halai ba iha mota ninin hodi haree mota nee, depois ho matebian Jelita dos Santos, tur hela iha ai hun ida, derepente rai lakan tarutu halo vitima nain tolu monu no la sadar ona ikus mai Jelita dos Santos, Idade 29, tenke lakon vida.
“Hau sente diak oituan ona, maske sei trauma, tanba hau ho matebian Jelita dos Santos tur hamutuk mak rai lakan kona ami no ami lakon kolega diak ida iha ami nia leet, maibe ida nee planu Maromak nian hotu, ita labele sata netik,” nia afirma.
(jen)
