DILI, STLTIMORLESTE.com – Akontese udan boot iha Oecusse iha loron 24 Marsu, akontese rai monu iha Suku Usi Tasae kuaze hektares ida ho balun, taka tomak mota neebe suli husi Noel Ekat tun ba mota ulun Noel Bitopa, sei lori dezastre boot ba komunidade Hau-Ana too Ponte Noefefan, tanba daudaun nee bee mota intupidu sai lagua boot, seidauk suli tun ba tasi.
Informasaun nee hatoo husi Tomas Colo nuudar Xefe Suku Usi Tasae, Postu Administrativu Oesilo, Rejiaun Administrativa Espesial Oecusse-Ambeno (RAEOA), ba STL liu husi telefone, Tersa nee (07/03/2026) katak, rai monu iha mota ulun Ponte Bitopa, kuaze semana rua resin ona taka tomak mota neebe suli husi Noel Ekat, agora dadaun sai lagoa boot, ida nee sei lori dezastre boot ba komunidade neebe hela iha Noel Bitopa, Oebaha, ba too Irigasaun Tono ba mota Noefefan ba Tasi kuandu nakfera dala ida.
“Ita akompanha iha Oecusse, udan kuaze semana rua resin ona, mota Noel Ekat kada loron suli hela deit, tanba udan boot iha Pasabe no Indonezia, daudaun bee intupidu iha rai neebe monu kuaze hektares 1 ho balun iha mota ulun Noel Bitopa. Hau informa ona ba Obras Publiku nomos Bombeirus atu buka dalan supa sai tiha bee nee, maibe preokupasaun neebe sira infrenta mak dalan atu asesu ba fatin refere mak ladiak,” dehan Xefe Suku Usi Tasae, Tomas Colo.
Nia haktuir tan katak, rai monu nee taka tomak foho iha mota ulun Bitopa, agora sai ona lagua, bee besik nakonu ona maibe labele suli ba tasi, tanba nee kuandu nakfera dala ida sei fo risku ba komunidade sira neebe mak hela iha Bairu Buki too Ponte Noefefan, daudaun mos iha Oecusse kontinua udan tau hela deit sei lori dezastre boot ba komunidade hahu husi labarik kiik oan too ema boot.
“Hau observa ona iha terenu no hau husu ba Obras Publiku ho Bombeirus, maibe dalan exefator sira tun ba fatin refere mak la diak, no kauza husi rai halai nee estraga komunidade sira nia toos kuaze hektares rua resin,” hatutan Xefe Suku Usi Tasae.
Iha fatin la hanesan, Komunidade Hau-Ana, Antonio Elu husu ba governu atu buka dalan kee tiha rai neebe halai taka tomak mota ulun Bitopa neebe oras nee mota nakfilak ba lagua boot, tanba kada loron udan hela deit, ida nee sei fo impaktu ba komunidade neebe hela iha hau-Ana ba too Padiae.
“Ami nuudar komunidade neebe mak hela iha mota ibun nee, kalan loron moris iha trauma nia laran, tanba ami ba haree ona rai monu neebe akontese iha mota ulun Bitopa, kuandu bee suli hela deit tanba udan la para, loron ruma sei nakfera, bee no rai isin sei taka tomak komunidade sira nia fatin iha Hau-Ana ba too Noefefan, tanba rai halai taka tomak foho, bee nee suli husi mota Noel Ekat,” dehan nia.
Nia rekomenda ba Governu liu husi Diresaun Rejional Infraestrutura ho Bombeirus buka dalan atu ba supa bee nee hodi suli neineik ona ba tasi, ou ho Exefator kee neineik bee dalan nee, atu labele kontinua intupidu iha foho neeba.
Antes notisia nee publika, seidauk konfirma ho Diretor Rejional Infraestrutura nomos Autoridade Protesaun Civil inklui Bombeirus hodi haree kestaun nee.
(jos)
