DILI, STLTIMORLESTE.com – Governu Timor Leste (TL) manifesta sentidu solidariedade ba povu no Governu Venezuela neebe lakon ema barak tanba kauza husi rai nakdoko neebe akontese iha loron 24 Junhu 2026.
Tuir nota komunikadu neebe STL asesu husi Governu iha loron Segunda nee (29/06) sita katak, Governu TL triste no laran taridu makaas wainhira simu notisia kona ba rai-nakdoko neebe akontese iha Venezuela iha loron 24 fulan Junhu.
Tuir Governu, imajen sira kona-ba kauza husi rai-nakdoko makaas sira ilustra gravidade husi destruisaun neebe kauza husi katastrofe neebe nunka akontese antes.
“Iha momentu tristeza ida nee, ami nia hanoin, solidariedade no esperansa hamutuk ho familia no belun sira neebe lakon ema neebe sira hadomi, ho sira neebe kanek, no ho autoridade sira, ekipa emerjensia sira, no voluntariu sira neebe la kolen buka sobrevivente sira no fo tulun ba vitima sira,” haktuir nota Komunikadu nee.
Governu Republika Demokratika Timor Leste hatoo sentidu kondolénsia klean ba família enlutada sira no repete ninia solidariedade ho povu Venezuela ba akontesimentu trajiku nee
Entretantu tuir notisia neebe STL asesu husi Antara News husi Indonezia, Prezidente Asembleia Nasional Venezuela, Jorge Rodriguez relata katak numeru husi ema mate husi rai-nakdoko makaas iha fatin rua hamutuk ema nain 1,450.
Iha diskursu neebe transmiti iha televizaun, Rodriguez hatete katak ema liu 3.150 mak hetan kanek, enkuantu 12.721 hetan dezlokasaun ka afetadu husi dezastre. Nia mos mensiona katak edifisiu hamutuk 774 mak.monu tanba rai-nakdoko sira.
Rodriguez hatete katak, operasaun sira buka no salvamentu nian sei lao hela. Pesoal salvamentu liu 25,000, inklui membru sira husi militar, polisia, ekipa protesaun sivil, Cruz Vermelha no organizasaun umanitaria oi-oin mak koloka hodi salva vitima barak liu tan.
Nia hatutan tan katak pesoal salvamentu internasional hamutuk 2.624 mak tulun iha resposta ba dezastre, hetan apoiu husi asu peskiza hamutuk 137 no veíkulu apoiu hamutuk 49.
Tuir Servisu Jeolojiku Estadus Unidus nian (USGS), rai-nakdoko rua, ho magnitude 7,2 no 7,5, akontese iha loron-kuarta iha Venezuela, ho deit segundu 39 nia laran.
Rai-nakdoko ho magnitude 7,5 nee sentra besik kilometru 23 ba sudeste Yumare, estadu Yaracuy, enkuantu rai-nakdoko ho magnitude 7,2 akontese besik kilometru 23,9 nordeste San Felipe, iha mos estadu Yaracuy, tuir USGS.
(alb)
