DILI, STLTIMORLESTE.com – Prezidente Republika (PR), Jose Ramos Horta hatoo ninia sentidu kondolensia klean ba Governu no povu Indonezia, hafoin rai nakdoko katastrofiku neebe akontese iha ilha Flores, hodi rezulta ema barak mate, kanek no destruisaun neebe boot.
Iha karta formal ida neebe diriji ba Sua Exelensia Jeneral TNI (Hor) (Ret.) Prabowo Subianto Djojohadikusumo, Prezidente Republika Indonezia, iha loron Tersa (18/08/2026), Prezidente Ramos Horta espresa tristeza klean konaba dezastre, neebe desloka ema rihun ba rihun no estraga makaas uma, fasilidade saude, eskola no infraestrutura krítiku sira.
“Hau hakarak hatoo ba Sua Exelensia hau nia sentidu kondolensia neebe klean no hatoo profunda solidariedade Timor-Leste nian ba família sira neebe lakon sira-nia ema neebe sira hadomi, nunee mos ba sira hotu neebe afetadu husi dezastre trajiku ida-nee. Iha tempu neebe nakonu ho terus no sofrimentu ida-nee, Timor Leste hamriik iha solidariedade fraterna ho povu Indonezia, liuliu komunidade sira iha area Flores neebe afetadu makaas liu, neebe hasoru hela konsekuensia husi katastrofe ida nee no dezafiu imensu neebe rezulta husi destruisaun infraestrutura no interupsaun ba asesu ba servisu esensiál sira,” afirma Prezidente Ramos Horta.
Prezidente hatoo agradesimentu ba ekipa sira ba buska no salvaguarda nian, profisional saude, forsa seguransa, no voluntariu sira neebe kontinua serbisu ho aten-barani iha kondisaun sira neebe susar tebes hodi tulun populasaun sira neebe afetadu.
Prezidente Ramos Horta konklui nia mensajen ho deseju sinseru ba rekuperasaun lalais ba sira neebe kanek no hatoo ninia esperansa katak esforsu tulun no rekonstrusaun sei hamenus lalais sofrimentu husi komunidade sira neebe afetadu.
(eme)
