DILI, STLTIMORLESTE.com – Rede Feto Timor Leste (RFTL) kondena makaas aktu neebe halo husi laen ho naran inisial JRX neebe oho nia feen Berta Soares ho kondisaun gravida iha Suku Bekora, no RFTL husu ba Tribunal fo pena todan ba suspeitu nee.
Kestaun nee hatoo husi Prezidente Konselhu Diretoria Rede Feto Timor Leste, Zelia Fernandes ba STL iha nia knaar fatin Kaikoli, Dili, Kuarta (23/10/2024).
“Ita kondena makaas aktu ida nee, tanba mane ida halo agresaun fiziku hasoru feen rasik neebe rezulta vitima rua dala ida, liu-liu bebe oan neebe mak seidauk hatene ka inosente husi inan aman nia hahalok ikus mai nia mos sai vitima hotu, ita kondena makaas aktu ida nee,” dehan Prezidente RFTL, Zelia.
Rede Feto kondena makaas ho aktu nee, maibe hanesan familia husi vitima nee rasik hatete ona katak kazu nee entrega ba iha Ministeriu kompotente, atu halo prosesu hasoru mane nee. Tanba nee husu Tribunal atu fo pena neebe mak todan ba mane ka laen neebe mak oho feen no oan dalan ida.
“Haree husi nia aktu neebe nia komete omisidiu hasoru ema nain rua dala ida, konserteza ita husu atu kondena aktu nee ho pena makaas ka pena neebe mak todan, atu hatete katak ida nee konsagra iha kodigu penal krime hasoru umanidade, krime omisidiu, tanba nee mak ita husu fo pena neebe mak todan hasoru ema nee,” katak Zelia.
Maibe nia dehan, iha familia nuudar feen no laen karik iha problema ruma iha meius atu rezolve problema laos ho krimi, satan omisidiu nee la diak, tanba halo krime laos dalan atu rezolve problema iha familia nia laran.
Nunee mos Akademista Judite Dias Ximenes hatete, tanba sa mak violensia nee kontinua akontese, tanba ema seidauk hatene kona-ba Direitus Humanus.
“Akontese violensia nee tanba ema seidauk hatene saida mak Direitu Humanus no estadu ladun promove direitus humanus nee, asegura deit lei maibe la sosializa la divulga, entaun ema hanoin buat ida baku ema no ema oho ema nee buat baibain ida,” katak nia.
(eme)
