DILI, STLTIMORLESTE.com – Rede Scamming Call Centre Ulmera antes nee iha prosesu primeiru interogatoriu, Tribunal Judisial Primeira Instansia Dili (TJPID) deside aplika medida tolu ba iha arguidu nain 76, tanba nee tuir defeza arguidu sira nian katak, se sira la kumpri kausaun, Tribunal bele halo fali alterasaun ba iha medida seluk.
Tuir informasaun katak, Tribunal halo alterasaun husi medida Aprezentasaun Periodika, medida Kausaun no medida Termo Indentidade Rezidensia (TIR) ba fali medida Prizaun Preventiva ba iha arguidu nain 74, maibe autoridade seguransa konsege detein deit arguidu nain 13, restu husi nee deskonfia la iha fatin.
Tribunal halo alterasaun husi medida neebe antes nee iha ona ba fali medida Prizaun Preventiva, defeza la iha konesementu konaba ida nee.
“Hau la iha konhesimentu ida, hau la hatene ida nee, maibe se Tribunal altera sira la kumpri medida prestasaun kausaun nee,” dehan Defensor Publiku, Henrique Mariz ba STL iha Kaikoli, Kinta (20/08/2026).
Nia hatutan, hanesan Defensor Publiku akompanha sira apenas too deit iha despaisu konaba medida koasaun, maibe se tuir mai sira la kumpri Tribunal bele altera.
Esplika, pedidu neebe mais proprosional atu labele limita sira nia liberdade mak iha alegasaun ba prosesu primeiru interogatoriu defeza husu Tribunal atu aplika medida kausaun, maibe iha medida kausaun neebe Tribunal aplika sira la depozita osan ba iha kausaun nee, nee Tribunal bele altera.
Esklarese, prosesu nee sei iha faze investigasaun, kuandu despaisu medida koasaun tun ona sira la kumpri, ida nee investigasaun laos Defensor mak automatikamente fo asistensia ba sira tanba sei iha prosesu inkeritu. No iha investigasaun MP bolu laos defeza ida nee mak akompanamentu ona sira, tanba sira sei iha distribuisaun, no medida neebe fo iha faze primeiru interogatoriu nee hanesan urjente, tenke fo akompanhamentu ba iha sira iha prosesu primeiru interogatoriu.
Depois ida nee sira bele hili fali Advogadu ka Defensor seluk neebe bele akompanha sira.
Antes nee mos Defensor Henrique Mariz deklara ona katak, arguidu sira la iha finanseru, tanba nee husu Tribunal atu prolonga tan loron 10 hodi depozita kausaun ba iha Tribunal.
“Sira hateten katak agora daudaun nee sira iha difikuldade kontaktu ho sira nia familia atu apoiu finanseira depozita ba iha osan kausaun nian nee, hau husu tan prolongasaun tempu 10 dias ba Tribunal, no Tribunal Admite ona. Horiseik hori bainrua mos hau fo hatene ona ba sira, atu fo hatene malu hodi depozita osan kausaun nee dentru loron 10 nia laran, se liu loron 10 nia laran mak la depozita osan nee, Tribunal bele avalia fila fali,” dehan Defensor Publiku Henrique Mariz.
Nia esplika, Tribunal aseita fo tan prazu loron 10 ba sira atu depozita osan kausaun nee. Iha momentu primeiru interogatoriu iha arguidu nain 76, no iha arguidu nain 75 nia parte maka fo asistensia ba.
Hatan konaba deskonfia arguidu balu halai ses husi teritoriu Timor, hanesan defeza la iha konhesimentu konaba ida nee.
Nia dehan, momentu iha prosesu primeiru interogatoriu kuandu despaisu Tribunal nian sai, defeza esplika ona ba sira konaba medida neebe Tribunal fo sai, tanba nee sira iha obrigasasaun tenke kumpri, se sira la kumpri Tribunal bele halo alterasaun ba medida neebe iha antes ona ba fali medida seluk.
Informa, Tribunal prolonga ona, tanba nee sira tenke depozita osan nee, se sira la depozita, ida nee problema sira nian, laos defeza nian.
Rekorda katak, Tribunal Judisial Primeira Instansia Dili (TJPID) iha loron Kinta (16/07/2026), liu husi despaisu ba prosesu primeiru interogatoriu deside aplika medida ba arguidu nain 76 neebe kaer iha Ulmera munisipiu Likisa.
Iha despaisu Tribunal nian deside aplika medida Aprezentasaun Periodika (AP) atu aprezenta an iha Eskuadra Polisia neebe hela besik ba fulan ida dala rua, no medida kausaun ba arguidu ho inisal D ho kausaun 10 mil, no ba arguidu nain 75 ho medida kausaun US$ 2500 kada arguidu, no kontinua mantein ho medida Termo Indentidade Rezidensia (TIR) neebe antes nee iha ona.
Tribunal mos fo prazu loron 10 ba arguidu sira hodi depozita kausaun neebe iha ba Tribunal, se la depozita Tribunal sei halo alterasaun husi medida kausaun ba fali iha medida Prizaun Preventiva.
Prosesu nee lori mai iha Tribunal, ho numeru NUC. 0248/26.PNSIK. No Ministeriu Publiku halo promosaun ba arguidu nain 76, ho krime haat (4) mak hanesan Krime Jogu ilisitu, Asosiasaun Kriminoza, Burla informatika no krime Brankamentu kapitais, tamba deskonfia envolve iha jogu online Scamming Call Centre.
Iha alegasaun Ministeriu Publiku reprezenta Prokurador, Domingos Gouveia, solisita ba Tribunal atu aplika medida koasaun Aprezentasaun Periodika, medida Proibisaun Auzensia no medida Kausaun ho osan rihun US$ 10 ba arguidu D nuudar manager ba atividade Online Scamming Call Centre, no arguidu nain 75, Ministeriu Publiku husu Tribunal atu aplika medida prestasaun Kausaun ho osan rihun US$ 5.
Enkuantu parte Defeza nian husu Tribunal atu aplika medida koasaun Aprezentasaun Periodika, medida Proibisaun Auzensia, no medida Kausaun ho osan menus husi $5 mill bazeia ba sira nia kondisaun ekonomika, tanba sira nee foin to mai Timor
Arguidu sira nee, Polisia Nasional Timor-Leste liu husi Diresaun Servisu Investigasaun Kriminal (DSIK), hamutuk ho Diresaun Servisu Informasaun Polisia (DSIP) iha Polisia Nasional Timor Leste (PNTL), detein sidadaun estranjeiru hamutuk nain 76 ho flagarante delitu.
Ekipa mos prende sira nia pasaporte iha area Ulmera Munisipiu Likisa nee hamutuk Pasaporte 76, telemovel no osan balun.
Prosesu Primeiru Interogatoriu nee, Prezide husi Juiz turnu, José Maria, Ministeriu Publiku reprezenta husi Prokurador Domingos Gouveia, arguidu nain 76 hetan asistensia legal husi Defensor Publiku Henrique Mariz no Advogadu Privadu, Eusebio Xavier.
(ter)
