AMBENO, STLTIMORLESTE.com – Prezidente Autoridade Rejiaun Administrativa Espesiál Oecusse-Ambeno (PA-RAEOA), Regio da Cruz Salu iha enkontru nee afirma katak, númeru forsa traballu iha 2026 seidauk ultrapasa limite ne’ebé estabelese iha Orsamentu Jerál Estadu (OJE) 2026, enkuantu prosesu reajustamentu estrutura administrativa no salariál kontinua liuhusi Task Force.
Iha aprezentasaun kona-ba situasaun orsamentu no estrutura RAEOA, autoridade kompetente esplika katak OJE 2026 define forsa traballu hamutuk 2.665 ema, enkuantu númeru atual iha RAEOA hamutuk aproximadamente 2.400 ema.
Ho komparasaun ne’e, RAEOA konsidera katak, instituisaun sei kumpre limite forsa traballu ne’ebé estabelese iha orsamentu 2026.
“Se ita rona katak, RAEOA iha staf barak liu, tenke haree dadus loos. Tuir mapa-pessoa iha OJE 2026, limite forsa traballu mak 2.665, enkuantu ita nia númeru atual 2.400 resin,” Esplika Pa-RAEOA.
Reajustamentu estrutura no salariu
Asuntu forsa traballu ne’e liga diretamente ho prosesu reajustamentu estrutura administrativa no salariál ne’ebé Task Force hala’o.
Tuir Tuir nia, objetivu reajustamentu mak atu asegura estrutura no númeru funsionáriu sira tuir nesesidade instituisaun, regra no disponibilidade orsamentál, nune’e pagamentu salariu no vensimentu la ultrapasa kapasidade orsamentu.
Nia subliña katak, diskusaun kona-ba estrutura RAEOA tenke bazeia ba dadus no regra administrativa, la’ós trata hanesan asuntu polítiku.
“Ida-ne’e asuntu interna. Ita tenke haree argumentu ne’ebé loos no defende ita nia staf bazeia ba dadus no kumprimentu ba lei,” nia hateten.
Task Force analiza forsa traballu
Prosesu reajustamentu ne’e hala’o iha konteksu Task Force ne’ebé responsavel atu analiza estrutura, mapa-pessoa no nesesidade forsa traballu RAEOA.
Tuir nia, rezultadu analiza ne’e sei uza atu determina estrutura no forsa traballu ne’ebé apropriadu, inklui impaktu ba orsamentu salariál.
PA-RAEOA konsidera katak, númeru atual besik 2.400 ema hatudu katak instituisaun la ultrapasa limite ne’ebé define iha OJE 2026.
Ho prosesu reajustamentu estrutura no orsamentu ne’ebé sei kontinua, RAEOA sei presiza garante katak desizaun kona-ba forsa traballu, salariu no alokasaun orsamentál bazeia ba lei, dadus ofisiál no nesesidade real instituisaun.
Tuir observasaun STL iha konvokatoriu Enkontru Membru Autoridade lidera direitamente husi Prezidente Autoridade RAEOA, Regio da Cruz Salu ho Sekretariu Rejional 3 no Diretor Rejional Serbisu Regional sira hamutuk 21 iha Salaun Alfandega Oecusse.
(jos)
