DILI, STLTIMORLESTE.com – Iha ambitu komemorasaun loron proklamasaun Indonezia ba dala 81, iha Embaixada Indonezia Dili Timor Leste, Jeneral Banku Mandiri, Hari Nugroho Sujiono dehan, ba on relasaun Indonezia-Timor Leste (TL) iha area ekonomia no kultura sei diak liu tan, tanba haree husi kultura no tradisaun hanesan, povu rai rua sei moris harmonia nafatin nuudar nasaun vizinhu.
“Hau fiar, ba oin Indonezia-TL nia relasaun sei sai diak no harmonia liu tan, tanba ita iha kultura, istoria no perspetiva neebe hanesan. Ohin ita selebra loron Independensia Republika Indonezia ba dala-81, ita foti hikas valor luta nian husi Prezidente dahuluk Indonezia Soekarno no fundador nasaun sira. Sira husik hela legadu katak luta boot liu maka luta ba dezenvolvimentu ita nia nasaun rasik. Hau mos kontente hela iha Dili tanba ambiente hakmatek, furak no bele moris saudavel ho desportu no aihan neebe natural,” dehan Jeneral Banku Mandiri, Hari Nugroho Sujiono ba STL hafoin selebra loron proklamasaun Independensia Indonezia ba dala 81 iha Embaixada Indonezia iha Dili Timor Leste, Segunda (17/08/2026).
Nia konfesa, hanesan sidadaun Indonezia neebe hela iha Dili TL, sente kontente tanba rai neebe hakmate, seguru no furak.
“Hau rasik, hanesan sidadaun Indonezia neebe hela iha Dili TL, sente kontente tebes tanba rai nee hakmatek, seguru no furak. Ita fasil atu halao moris saudavel tanba iha atividades desportu barak no asesu ba aihan organik neebe laiha kimiku barak. Kondisaun sira nee tulun ita sai ema neebe produtivu liutan, nafatin hadia kooperasaun, respeitu malu no serbisu hamutuk ba prosperidade povu rua nian.
Iha biban nee, Amo Urbanus Bunga Lolon SVD dehan, ohin realiza atividade selebrasaun loron Independensia Republika Indonezia ba dala-81. Aktividade nee sai mos oportunidade atu reforsa relasaun bilateral entre Timor Leste no Indonezia.
“Ohin ita selebrasaun loron Proklasaun Independensia Indonezia ba dala 81, iha embaixada Indonezia Dili TL, hau haree husi Embaixada Indonezia, halo atividades oi-oin, hahu husi Desportu laos sidadaun Indonezia deit maka hola parte iha serimonia nee, maibe involve mos maluk Timor oan barak hodi hasae sira nia talentu iha ara desportu, muzika no seluk tan, hatudu katan relasaun TL-Indonezia hanesan maun alin hodi hametin amizade, fraternidade, maske haree husi serbisu administrasaun nee, ita nasaun ketak-ketak, maibe haree husi relasaun nee nuudar maun alin, tanba nee hau admira loos ho selebrasaun loron Independensia nian agora nee,” dehan nia.
Iha sorin seluk, Xefe Komisaun Organizadora ba Komemorasaun Loron Aniversariu Independensia Indonezia ba dala 81 iha KBRI Dili, Eka Putra Musa Mauboy dehan, nia nuudar sidadaun Indonezia nebe hela kleur ona iha Dili TL, sente kontente teb-tebes tanba rai hakmatek, seguru no furak, relasaun nasaun rua tenke sai nafatin parseria neebe fo benefísiu ba povu iha area edukasaun no ekonomia.
“Ami fiar katak ho esperiensia Indonezia nian iha ASEAN no TL nia knaar iha ASEAN, ita bele serbisu hamutuk diak liutan. Ita iha kultura, lian no istoria neebe hanesan,” dehan nia.
Nia dehan, iha selebrasaun loron Independensia Indonezia bad ala 81, konsege realiza ona aktividade hanesan kompetisaun no eventu kultural sira lao ho diak no tuir nafatin lei no regulasaun neebe Governu TL estabelese. Komunidade mos partisipa masimu, konvida sidadaun TL no Indonezia neebe hela iha TL, inklui labarik sira, atu partisipa iha eventu sira nee.
Iha biban nee mos lori komisaun nia naran, hatoo agradese ba Governu TL husi parte oi-oin neebe apoiu ativiades selebrasaun loron Independensia Indonezia nian ba dala 81 nomos atividades seluk-seluk tan, governu TL sempre apoui, tanba nee agradese.
(jos/mik)
