DILI, STLTIMORLESTE.com – Hahu husi fulan Janeiru too mai iha fulan Setembru, Diresaun Jeral Servisu Rejistu Notariadu (DJSRN), hatama reseita husi pasaporte nian ba iha kofre estadu hamutuk US$ 2.966.
Diretor Jeral Servisu Rejistu Notariadu, Agustinho Gonsalves Viera hatete, hahu husi fulan Janeiru too mai iha fulan Setembru, sira hatama ona reseitas ba iha kofre estadu.
“Husi Janeiru mai too iha fulan Setembru hamutuk US$ 2.966 mai husi pasaporte komun no pasaporte diplomata sira,“ dehan Agustinho ba jornalista sira, iha Mandarin, Segunda (04/11/2024).
Nia hatutan, pasaporte neebe sai ona hodi hatama reseitas mai iha estadu hamutuk rihun US$ 40, no agora garante kaderneta pasaporte neebe iha bele produs too iha fulan Dezembru.
Iha fulan Dezembru kaderneta pasaporte foun rihun 70 sei tama tan, no prova ona orsamentu US$ 5.000 prepara hotu ona, asina kontratu ona hein, selu deit. No osan mai husi Finansa, nafatin halao kontratu ho Kompanhia Thales.
Hatan kona-ba makina Bilite Indentidade (BI) nia parte dehan, agora loke hela tender ba akizasaun sosa foun, no hetan ajuda husi UNICEF no orsamentu mos mai husi UNICEF, tanba Governu Timor no UNICEF servisu hamutuk sira fasilita.
Nia hatutan, kada makina ida ho folin rihun US$ 6, no garante katak neineik makina nee sei too. Blanko BI kuandu makina seidauk too mai, sidadaun sira neebe uza ida foto kopia sei bele uza hela uza deit, kuandu hakarak ba rai liur kontaktu sira, atu buka fali fatin seluk imprime orijinal fo ba sira.
Ezemplu estudante sira, ema moras atu ba halo tratamentu iha rai liur, fasilita sira no sira neebe la urjente bele hein, no estok ba orijinal sei iha hela, bele uza too iha Dezembru bele too mos Janeiru.
Iha fatin ketak, Komunidade Domingos Mendonsa dehan, parte ida neebe kontruibui reseitas ba estadu, ida mos mak pasaporte.
“Pasaporte hatama reseitas ba estadu, tanba nee ba oin tenke kria tratamentu ida neebe diak, atu ema hirak neebe tarata pasaporte bele atende sira ho diak,” dehan nia.
(ter)
