DILI, STLTIMORLESTE.com – Ministru Defeza Kontra Almirante Donaciano do Rosário da Costa Gomes “Pedro Klamar Fuik” hateten, reuniaun Ministru Defeza CPLP ba dala-25 sei realiza iha Dili, Tersa (02/6/2026) aban sei destaka importansia pas, dialogu, kria estabilidade iha fatin hotu-hotu neebe mak CPLP nia espasu interese.
“Prinsipiu CPLP nian mak dezenvolve rai CPLP nian iha ambitu pas, dialogu kria estabilidade iha fatin hotu-hotu neebe mak CPLP nia espasu interese, ida nee mak sai hanesan fator prinisipal ba reuniaun CPLP agora,” hatete Ministru Defeza Kontra Almirante, Donaciano do Rosário da Costa Gomes “Pedro Klamar Fuik” ba jornalista sira hafoin simu audiénsia Ministru Defeza São Tomé e Principio, Horacio de Sousa iha Ministeriu Defeza, Segunda (01/06/2026).
Nia dehan, nasaun CPLP nuudar amigu diak ba Timor Leste, tanba tulun Timor Leste hahu kedan iha tempu difisil.
“Hanesan ita boot sira hotu hatene katak, países amigos CPLP sira hotu-hotu inkluzivamente São Tomé e Principio iha ita nia istoria da libertasaun, iha tempu difisil sira hotu-hotu hamutuk ho ita, sira hamoris ita nia problema sira, hamoris ita nia sentimentu, hamoris ita nia terus no sira solidariza ho ita, sira fo apoiu hotu-hotu, iha fitun hothotu sira fo apoiu,” nia deklara.
Ministru Pedro Klamar Fuik hateten, tinan nee nuudar tinan importante ba Timor Leste, tanba prezide reuniaun nivel ministerial CPLP nian no liu husi reuniaun ida nee nasaun CPLP bele tulun malu partilha no halo diskusaun hodi lori pas no estabilidade, promove dialogu ba nasaun CPLP iha neebe deit atu kontribui pas iha mundu.
Nia informa, CPLP nee importante ba Timor Leste, tanba depois de independensia sira fo nafatin sira nia apoiu tuir saida mak sira bele, sira balun iha, sira balun laiha, maibe tanba istória, tanba komunidade ida bolu CPLP nee tau hamutuk.
“Ita halo reuniaun sira nee para ita bele koalia ba malu, rona ida nia hanoin oinsa, ida nia problema saida, ida nia hakarak saida, para atu hanoin hamutuk saida mak ita bele halo diak liu para mundu nee diak liu. Mas prinsipiu CPLP nian mak dezenvolve rai CPLP nian iha ambitu pas, dialogu, kria estabilidade iha fatin hotu-hotu neebe mak CPLP nia espasu interese, ida nee mak sai hanesan fator peinisipál ba reuniaun CPLP agora,” nia hatutan.
Ministru Defeza Kontra Almirante “Pedro Klamar Fuik” hatete, molok atu realiza reuniaun Ministru Defeza CPLP, Ministru sira CPLP nian husi São Tomé Prinsipiu, Ministru Horacio Trindade de Sousa neebe mak mai partipa iha reuniaun dos Ministru Defeza ba CPLP 25, neeebe mak Timor Leste mak sai hanesan uma nain, Timor Leste mak organiza atualmente, Ministru Defeza hotu hotu neebe mak mai partisipa sira mai komprimenta Ministru Defeza Timor Leste nian.
Entretantu iha Segunda (01/6/2026) ohin hahu reuniaun, Diretór Ministru Defeza CPLP ba dala-25 neebe mak halo iha Ótel Palm Spring.
No iha Tersa (02/6/2026) aban kontinua ho reuniaun Ministru Defeza CPLP ba dala-25 no reuniaun referenda tuir ajenda sei prezide husi Ministru Defeza Kontra Almirante Donaciano do Rosário da Costa Gomes “Pedro Klamar Fuik” no partipa husi Ministru Defeza nasaun CPLP Angola, João Ernesto dos Santos, Ministru Defeza São Tomé e Príncipe, Horácio de Sousa, Ministru Defeza Brazil Jenerál, Almirante R. de R. Freire, Sekretária Estadu Portugal, Ana Isabel Xavier no MinistruDefeza Moçambique, Cristóvão Artur Chume.
(jen)
