DILI, STLTIMORLESTE.com – Rede Feto Timor Leste (RFTL) hamutuk ho parseiru hanesan Adra, Uniaun Europeia no SEI lansa loja hakbiit Feto TL.
Remata halo lansamentu, Prezidente Konselhu Diretora Rede Feto Timor Leste, Zelia Fernandes ba jornalista sira iha salaun Rede Feto, Tersa nee (05/11/2024) hatete, loja hakbiit ekonomia feto ka loja hakbiit feto TL, nee sai hanesan mehi ida neebe Rede Feto no membru sira mehi iha tinan barak nia laran.
“Loja hakbiit ekonomia feto ka hakbiit feto TL nee sai hanesan mehi ida neebe Rede Feto no membru sira mehi iha tinan barak nia laran. Bainhira hahu iha diskusaun iha inisiu ita hanoin katak programa ka hakbiit feto importante ba iha ita nia luta, bainhira feto ida ekonomikamente independente ou feto iha rasik nia obra ruma ida nee sai orgulhu feto sira bele kontribui ba iha foti desizaun no prevensaun ba violensia bazeia ba jeneru,” dehan nia.
Nia hatete, depois prosesu naruk nia laran ohin tempu duni konsege lansa loja ida nee, no loja nee laos deit sai hanesan fatin ou sentru hodi faan produtu husi inan feton sira, maibe loja ida nee sai hanesan mos sentru ba informasaun, fatin diskusaun oinsa mak bele fahe esperiensia no aprende ba malu kona-ba saida mak halo ho feto sira nia kapasidade neebe mak iha nanis ona, liu-liu iha parte prosesamentu produtu agrikula sira neebe mak iha no oinsa bele lori ba merkadu.
Nunee mos Embaixador Uniaun Europeia iha Timor Leste, Marc Friedrich hatete, haksolok tebes atu fila fali mai resintu Rede Feto, ida nee asaun neebe mak importante halao ba feto sira iha TL ho SEI, no Rede Feto neebe servisu hamutuk.
“Ita hasoru malu ohin ba fulan balun deit ona antes projetu nia rohan neebe mak halao ona durante tinan 4 no hanesan iha okaziaun barak durante periodu ida nee ita hamutuk iha nee liu husi organizasaun Adra TL, lider ida hodi fo apoiu ba feto Timor oan sira, ami lao dook ona desde 2021 no ohin ita marka momentu ida ba atizimentu sira projetu ida nee nia,” katak embaixador nee.
Nia hatete, projetu neebe nia koalia mak konserteza apoiu OSC ou feto Timor oan sira nuudar ajente merkadu forte neebe implementa husi Adra TL, no RFTL, ho envolvimentu husi membru Rede Feto barak.
Nunee mos Reprezentante Adra Timor Leste Programa Quality Projetu Development Coordinator Sanjay Mathew hatutan, independensia finanseiru nuudar save importante ida ba empoderamentu feto hodi kombate violensia bazeia ba jeneru.
(eme)
