BAUCAU, STLTIMORLESTE.com – Projetu konstrusaun postu saúde no rezidensia ba pesoal saúde iha Suku Ossoala, Postu Administrativu Vemasse, Munisípiu Baucau ho valór orsamentu US$ 293,854.47, progresu fiziku atinji 11%.
Xefi Suku Ossoala, Francisco Gama da Costa Lobo hateten, projetu rua ne’e finansia husi Autoridade Munisipál Baucau liuhusi Programa Dezenvolvimentu Integradu Munisipál (PDIM) anu fiskal 2026, no implementasaun hahú ona husi kompaña responsabilidade ba projetu refere iha área Uatutogu, Aldeia Hoineuai.
“Kompaña sira hahú ona konstrusaun, tuir kalkulasaun tekniku sira dehan atual atinji ona 11%,” Francisco Lobo hateten ba jornalista sira iha Sentru Konvensaun Baucau Vila Antiga, Kinta (17/09/2026).
Nia esplika, projeitu konstrusaun rezidensia ba pesóal saúde kompostu uma rua, inklui dapur no instalasaun sanitária, ne’ebe responsabilidade husi kompañia PLANALTO STAR, Unip. Lda, ho valor kontratu US$115,931.19 ba durasaun implementasaun servisu tinan ida.
Enkuantu konstrusaun postu saúde responsabilidade husi kompañia PALUMBEL, Unip. Lda, ho alokasaun orsamentu US$177,923.28 ba durasaun servisu tuir kontratu tinan ida.
Autoridade Suku nee konsidera, konstrusaun infraestrutura rua refere importante, tanba bele responde ba nesesidade komunidade iha asesu ba servisu saúde besik, inklui rezolve preokupasaun kona-ba fatin hela ba profisionál saúde.
“Ida-ne’e bele responde ona komunidade nia ezijénsia tanba kompleta ho rezidensia ba pesóal saúde ne’ebé sai preokupasaun ba profisionál saúde durante ne’e,” Francisco Lobo akresenta.
Tuir nia konstrusaun postu saúde no rezidensia refere espera bele aumenta disponibilidade infraestrutura saúde no apoia presensaun profisionál saúde iha área Ossoala, bainhira projetu remata tuir prazu kontratu.
Entertantu, Suku Ossoala iha Aldeia Hoineuai, Kaidenulale, Uma-ana Iku, Lulinunu no Uaiknase, ho total populasaun hamutuk na’in 2,114.
(tom)
