DILI, STLTIMORLESTE.com – Sai vida peskador hamoris nesesidade uma-laran ba futuru, tanba nee labele depende deit ba governu, maibe tenke esforsu uluk ho ekipamentu neebe simples lori buka ikan hodi hein ajuda governu karik iha.
Lia hirak nee hatoo husi Peskador, Augosto Sousa Guterres ba jornalista STL iha Metiaut, Kuarta (15/4/2026).
Tuir Augosto, ekipamentu neebe uza durante nee hodi peskas laos ekipamentu modernu ho makina, uza deit bero ho liman hodi peska, tanba nee peska loron tomak, kalan tomak dalaruma la hetan ikan aat liu tan tempu laloran tasi boot, moris ho vida peskador la fasil sempre hasoru dezafiu oin-oin maibe ho pasiensia buka nafatin tanba servisu mak ida nee ona.
Peskador husi Aldeia Kamea, Suku Kamea, Postu Administrativu Cristo-Rei hateten, antes nee sira halo ona proposta hatoo ba Ministeriu Agrikultura no Peskas (MAP) husu ekipamentu peska hanesan ro, rede ho ekipamentus seluk maibe too ohin loron seidauk hetan resposta. Governu ida sae, governu ida tun hanesan deit, tanba nee la presiza hein husi governu. “ita rasik ho inisiativa uza ekipamentu neebe iha buka ikan hodi hein proposta neebe iha, karik governu fo ita agradese, la fo mantein lao ho ekipamentus neebe iha,” katak nia.
Peskador nee fundamenta, nia rasik hola parte vida peskador laos foin tempu ukun-aan maibe, sai peskador iha liu tempu okupasaun Portugues mai tempu okupasaun Indonezia too era ukun-aan, nee duni toman ona uza kualker ekipamentu hodi buka ikan. Maibe problema ba nia hasoru maka fatin permanente ba sira peskador atu faan ikan la iha tanba nee kuandu hetan ikan ho pasiensia leba lao faan tuir dalan.
Nunee mos Peskador, Domingos Silvestri Pinto dehan, ikan neebe sira nain rua hetan husi rejultadu peska tuir tempu, tempu diak ida bele kaer barak depende ba laloran tasi. Maibe too tempu udan laloran tasi boot sira labele ba luku tasi. Kona-ba governu fo ajuda karik fo mai ita agradese tanba ema barak neebe depende ba governu karik fo mai agradese. “Ami husu mak nee aban-bainrua governu hasai ami husi tasi-ibun kria fali fatin ruma hodi fasilita faan ikan,” katak Domingos.
Tuir Domingos durante nee governu seidauk prepara fatin ba peskador faan ikan ho seguru no saudabel, tan nee kuandu hetan ikan hakarak ka lakohi leba todan ba mos lao-ain ho distansia neebe dook faan tuir dalan tama sai bairru.
(ger)
